Մենք ուշադիր հետևում ենք քաղաքական սպանությունների և այլ ահաբեկչական գործողությունների ենթադրյալ դավադրության կազմակերպման մեջ մեղադրվող 21 անձանց ձերբակալությանը:Այս մասին «Առաջին լրատվական»-ի գրավոր հարցմանը պատասխանել է ՀՀ-ում ԱՄՆ դեսպան Ռիչարդ Միլսը՝ անդրադառնալով նոյեմբերի 25-ին Երևանի Նորք Մարաշ վարչական շրջանում զինված հանցախմբի վնասազերծման դեպքին:
«Ներկայումս մենք չգիտենք, թե արդյոք այս ձերբակալությունները որևէ սպառնալիք ներկայացնում էին Հայաստանում գտնվող ԱՄՆ քաղաքացիների համար: Մեղադրանքներն, այնուամենայնիվ, լուրջ են, և Միացյալ Նահանգները հաշվի կառնի Հայաստանի կողմից հետաքննությանը սատարելու խնդրանքները: Մենք կոչ ենք անում ՀՀ իշխանություններին քննության զարգացումների և ներքին անվտանգության միջոցների հետ կապված ցանկացած փոփոխության մասին տրամադրել հնարավորինս թափանցիկ տեղեկատվություն և հասարակության շրջանում ապահովել հանգստության ու մասնակցության մթնոլորտ՝ դեկտեմբերի 6 սահմանադրական հանրաքվեի նախաշեմին»,-նշել է դեսպանը: