«Մոտենում ենք եզրագծին, կարծում եմ՝ բոլորդ էլ հասկանում եք, որ առաջիկա օրերն արտառոց օրեր են լինելու հայ ժողովրդի համար», այսօր Ընդդիմության միասնական շտաբի գրասենյակում հրավիրած մամուլի ասուլիսին իր խոսքն այսպես սկսեց «Հիմնադիր խորհրդարանի» անդամ, «Նոր Հայաստան» փրկության ճակատի շտաբի պետ Ժիրայր Սէֆիլյանը:
Ժ. Սէֆիլյանն ամփոփեց նախորդ ամսվա ընթացքում «Նոր Հայաստան»-ի իրականացրած գործունեությունը, այնուհետև անդրադառնալով դեկտեմբերի 1-ի հանրահավաքին ՝ կոչ արեց հնարավորինս ակտիվորեն մասնակցել դեկտեմբերի 1-ին ժամը 18.00-ին Ազատության հրապարակում կայանալիք հանրահավաքին և հավելեց. «Դեկտեմբերի 1-ին դուրս ենք գալու Ազատության հրապարակ ու չենք վերադառնալու տուն, մինչև չձերբազատվենք կեղեքող համակարգից: Մեր քաղաքացիներից խնդրում ենք պատրաստված լինեն, որպեսզի սննդի ու հանդերձանքի խնդիր չլինի մի քանի օր. դրանով մեզ օգնած՝ կազմակերպչական բեռը թեթևացրած կլինեն: Եթե կլինեն քաղաքացիներ, որ դրա հնարավորությունը չեն ունենա, պատրաստ ենք օժանդակել:
Տեղեկացնեմ նաև, որ առավոտյան իրազեկել ենք քաղաքապետարանին՝ վրաններ տեղակայելու թույլտվություն ստանալու նպատակով: Հնարավոր է՝ տարբերակներից մեկը դա լինի, բայց վերջնական որոշումը կկայացվի վաղը Ազատության հրապարակում»:
Ժ. Սէֆիլյանի խոսքով՝ եթե մարզերից եկողների մուտքը դեպի քաղաք խոչընդոտվի, կդիմեն միջոցների: «Բացի այդ, նրանք, ովքեր Երևանում հնարավորություն չեն ունենա հյուրընկալվելու հարազատների, բարեկամների, ընկերների կողմից, այդ պարտականությունը ևս մեր շտաբը կվերցնի իր ուսերին»,- հավաստիացրեց Ժիրայր Սէֆիլյանը:
Լուսանկարը` PAN Photo-ի