Քվանտային կապի առաջին արբանյակային համակարգերը, որոնք հնարավորություն են տալիս հաղորդակցության անվտանգ գծեր ստեղծել մեծ հեռավորությունների վրա, կմշակվեն Չինաստանում և Ճապոնիայում մոտ 1-2 տարի անց: RIA Novosti-ի հաղորդմամբ՝ այս մասին Մոսկվայում իր նոր գրքի շնորհանդեսին հայտարարել է շվեյցարացի ֆիզիկոս Նիկոլյա Ժիզանը:
«Իհարկե, այդպիսի կապի համար կպահանջվի աստղադիտակների նոր սերունդ, և միայնակ ֆոտոնների աղբյուրը դուք ստիպված կլինեք տեղավորել հենց արբանյակի վրա: Այդ կապակցությամբ մի ամբողջ «տեխնոլոգիաների մրցավազք» գոյություն ունի Չինաստանի և Ճապոնիայի միջև, և հաջորդ տարի, կարծում եմ, այդ երկրներից մեկը կստեղծի առաջին նման սարքերը»,- հայտարարել է Ժիզանը:
Նրա խոսքով՝ նման նախագծեր մշակվում են նաև ԱՄՆ տարածքում, սակայն «այնտեղ ամեն ինչ գաղտնի է, և մենք չենք կարող իմանալ՝ ինչ առաջընթաց են գրանցել ամերիկացի ֆիզիկոսները և ինժեներներն այդ ոլորտում»:
20-րդ դարի սկզբից գիտնականները մշակում են տեղեկատվության կոդավորման և անվտանգ փոխանցման մեթոդներ: Այսպես կոչված՝ քվանտային ցանցերը դա ապահովում են ի հաշիվ այն բանի, որ Գեյզենբերգի անորոշության սկզբունքը «երրորդ ավելորդին» թույլ չի տալիս հասանելիություն ձեռք բերել այդ տվյալներին:
