ԱՄՆ-ում ավելի քան 150 միլիոն մարդ հանգստյան օրերն անցկացրել է ակտիվ գնումներ կատարելով՝ հայտնում է RIA Novosti-ն:
«Սև ուրբաթը» երկրում ավանդական վաճառքների օրն է, որը հաջորդում է Գոհաբանության օրվան: Նոյեմբերի վերջին ուրբաթ օրը ռիթեյլերները գները նվազեցնում են 25-80 տոկոսով: Սակայն առավելագույն զեղչերը տարածվում են միայն սահմանափակ քանակությամբ ապրանքների վրա:
Վերջին ժամանակներս ԱՄՆ-ում «սև ուրբաթը» անցնում է ավելի հանգիստ՝ վերածվելով առևտրային մարաթոնի: Արդեն առաջին տարին չէ, որ առևտրական կենտրոնների խոշոր ցանցերում վաճառքները սկսվում են Գոհաբանության օրվա երեկոյան, իսկ որոշ կենտրոններ իրենց դռները բացում են կեսգիշերին:
ԱՄՆ-ի Մանրածախ առևտրի ազգային ֆեդերացիան հայտնել է, որ նոյեմբերի վերջին հանգստյան օրերին ծրագրել է գնումներ կատարել 136 միլիոն մարդ, սակայն վերջին տվյալներով՝ այդ թիվը գերազանցել է 151 միլիոնը: 103 միլիոն մարդ այցելել են ինչպես առևտրային կենտրոններ, այնպես էլ առցանց խանութներ: Նշվում է, որ գնումների 60%-ը կատարվել է առցանց:
Հանգստյան օրերին յուրաքանչյուր մարդ միջինը ծախսել է 299,6 դոլար, որի 70 տոկոսը՝ նվերների համար: