Մեր այսօրվա ավանդական «Էվոլյուցիա» թողարկման հերոսուհին Ադելն է, ում ալբոմը ԱՄՆ-ում վաճառքի նոր ռեկորդ է սահմանել, հայտնում է spletnik.ru-ն:
Ադելը ծնվել է Մեծ Բրիտանիայում: Նա սկսել է ելույթ ունենալ դեռևս դպրոցական տարիքից: Դպրոցից հետո Ադելը որոշել է շարունակել կրթությունը և ընդունվել է Կատարողական արվեստի Լոնդոնյան դպրոցը և հաջողությամբ ավարտել այն:
Դժվար է հավատալ, սակայն երգչուհու ճանապարհի առաջին աստիճանը եղել են սոցիալական ցանցերը: MySpace-ում հայտնվել է Ադելի դեմո-ժապավենը` ձայնագրված դեռևս պատանեկության տարիներին: Դրա հաջողության շնորհիվ Ադելը ստորագրել է իր առաջին պայմանագիրը:
2007 թվականին երգչուհին թողարկել է իր նորամուտային Hometown Glory սինգլը, իսկ 2008-ին` նորամուտային «19» ալբոմը, որը գլխավորել է ազգային հիթ-շքերթը և երիտասարդ երգչուհուն դարձրել աստղ: Այդ ժամանակ Ադելը առաջին անգամ ներկայացվել է «Գրեմմի» մրցանակին:
2011 թվականին Ադելը թողարկել է իր երկրորդ ալբոմը` «21»-ը, իսկ վերջերս թողարկել է երրորդ` «25» ալբոմը, որն էլ անմիջապես ԱՄՆ-ում վաճառքի նոր ռեկորդ է սահմանել: Բացի դրանից՝ Ադելը ձայնագրել է «007. Սքայֆոլի կոորդինատները» ֆիլմի սաունդթրեքը, որի համար նա արժանացել է «Օսկար» և «Ոսկե գլոբուս» մրցանակների, շատ այլ պարգևների:
Երգչուհու անձնական կյանքը նույնպես հաջող է: Նա արդեն մոտ 5 տարի է՝ ապրում է իր բոյֆրենդ Սայման Կոնեկիի հետ: Նրանք ունեն որդի: