Վերջին շրջանում ռուս-թուրքական գերլարված հարաբերությունների և Հայաստանի վրա դրանց հնարավոր ազդեցության մասին «Առաջին լրատվական»-ը զրուցեց Գլոբալիզացիայի և տարածաշրջանային համագործակցության վերլուծական կենտրոնի խորհրդի նախագահ Ստեփան Գրիգորյանի հետ:
«Իրավիճաը գլոբալ տեսանկյունից գնահատալով՝ կարելի է ասել, որ Ռուսաստանը վերջին 2-3 տարում ագրեսիվ քաղաքականություն է վարում: Կարծում եմ՝ Ռուսաստանն ինչ-որ չափով չափերն անցավ, երբ որ մտավ Սիրիա: Մի կողմից կարծես թե Ռուսաստանը կարող էր իրոք օգտակար լինել, բայց մյուս կողմից էլ բոլորը հասկացան, որ Ռուսաստանի ախորժակը և համարձակությունը մեծանում են,- նշեց մեր զրուցակիցը և հավելեց. «Գտնվեց պետություն՝ Թուրքիան, որ համարձակվեց հակահարված տալ Ռուսաստանին: Դա ապտակ էր և՛ Պուտինի ինքնասիրությանը, և՛ Ռուսաստանի ամբիցիաներին: Թուրքիան ցավոտ է տանում, երբ որ իր պատմական տարածք են մտնում: Թուրքիան հնարավոր է, որ այդ քայլը նույնիսկ ինքնուրույն արեց, բայց հասկանում է, որ իր թիկունքին կանգնած է Միացյալ Նահանգները»:
Ըստ Ստեփան Գրիգորյանի՝ թեպետև լարվածությունը շարունակվում է, բայց մեծ պատերազմներ չեն լինի, այնուամենայնիվ, Ռուսաստանը կպատասխանի. «Այսօրվա Ռուսաստանը կառուցված է հենց Պուտինի հեղինակության վրա, դա հարված էր այդ հեղինակությանը, և այս պետությունը կփլվի, եթե Ռուսաստանը չարձագանքի»:
Ստեփան Գրիգորյանի դիտարկմամբ՝ Թուրքիան և Ռուսաստանը կօգտագործեն հայկական խաղաքարտը: Նրա խոսքով՝ հաշվի առնելով հայ ժողովրդի պատմությունը՝ մենք պետք է փորձենք մաքսիմալ չեզոք լինել: Քաղաքական հայտարարություններ կարող ենք անել, բայց դրանք պետք է լինեն շատ մեղմ:
«Եթե Ռուսաստանը ռուսական բազան օգտագործելու իրավունք ստանա, այդ դեպքում մենք կդառնանք թիրախ ոչ միայն Թուրքիայի համար, այլ նաև այլ խաղացողների համար,- մտահոգություն հայտնեց Ս. Գրիգորյանը և հավելեց. «Հայաստանի դիրքորոշումը պետք է լինի շատ չափավոր: Մենք չպետք է գործողությունների անցնենք, օրինակ՝ մեր օդանավակայանները չպետք է տրամադրենք ոչ ոքի»:
Մանրամասները՝ տեսանյութում: