Թուրքիայի կողմից խոցված ռուսական Սու-24-ի հետ կապված պատահարի հանդեպ կողմերի արձագանքը վկայում է արագ առաջընթացի մասին ոչ միայն տվյալ հարցի վերաբերյալ, այլ նաև ավելի լայն իմաստով, ինչպիսին է տարածաշրջանում բռնության զսպումը: Այս մասին հայտարարել է ԱՄՆ նախագահի անվտանգության հարցերով նախկին խորհրդական Զբիգնև Բժեզինսկին Politico պարբերականին տված հարցազրույցին:
Բժեզինսկին նշել է, որ կողմերը ցուցաբերում են ավելի խելամիտ մոտեցում ստեղծված իրավիճակում, ինչպես նաև Սիրիայում տիրող իրավիճակի հանդեպ: Միևնույն ժամանակ նա թեթևություն է զգում այն կապակցությամբ, որ ռուսական ինքնաթիռը խոցվել է ոչ ամերիկացի զինվորականների կողմից, և որ պատահարը տեղի է ունեցել ոչ Մերձբալթյան երկրներում: Նրա խոսքով` այս դեպքում Ռուսաստանը կարող էր արձագանքել այլ կերպ, և այդ ժամանակ ակնհայտ կլիներ ԱՄՆ կողմից ուժային միջամտության անհրաժեշտությունը:
Անդրադառնալով սիրիական ճգնաժամին`Բժեզինսկին հայտարարել է, որ Բաշար Ալ-Ասադի իշխանության շարունակությունը էական շահ չի բերի Ռուսաստանին, միևնույն ժամանակ Ալ-Ասադի հրաժարականը շահավետ չէ ԱՄՆ-ի համար: Նրա կարծիքով` երկու կողմերն էլ թաքուն հետաքրքրված են, որպեսզի իրար մեջ խոշոր բախում թույլ չտան:
Բժեզինսկին հավատացած է, որ Ռուսաստանը և Արևմուտքը հետաքրքրված են կայունության պահպանմամբ: Ինչ վերաբերում է իշխանությունից Ալ-Ասադի հեռանալուն, դժվար թե կողմերից որևէ մեկը իր կենսական շահերը կապում է նրա ճակատագրի հետ` եզրափակել է Բժեզինսկին:
