Սու-24-ի միջադեպով Թուրքիան ցանկացավ ուժ ցուցադրել, սակայն սխալվեց, հայտարարել է Չեխիայի նախագահ Միլոշ Զեմանը՝ կիրակի օրը ելույթ ունենալով Prima TV-ով:
«Եթե, հնարավոր է, Թուրքիայի օդային տարածքը խախտվել է 17 վայրկյանով, ապա քիչ հավանական է, որ այդ ժամանակահատվածում ռուս օդաչուն 10 անգամ նախազգուշացված լիներ, որ թռչի սիրիական կողմ»,- հայտնել է Զեմանը:
Նշելով, որ ռուսական ինքնաթիռը ընկել է Սիրիայի տարածքում, դեպքի ժամանակ զոհվել են երկու մարդ, որոնցից Սու-24-ի օդաչուին կրակել են օդում վայրէջքի ժամանակ, նախագահն ասել է, որ «դա հակասում է Ժնևյան կոնվենցիային»:
Զեմանի խոսքով` Թուրքիան կասկածվում է այն բանում, որ անուղղակիորեն համագործակցում է ահաբեկիչների հետ, մասնավորապես ԴԱԻՇ-ից էժան նավթ ստանալով: Անկարան թշնամություն է անում քրդերի հետ, սակայն հատկապես «քրդերի զինված մասն է հանդիսանում փաստորեն միակ ուժը, որ կռվում է ԴԱԻՇ-ի դեմ»,- հայտարարել է Զեմանը:
«Կա այսպիսի ասացվածք – իմ թշնամու թշնամին իմ բարեկամն է: Թուրքական թշնամությունը քրդերի հետ տանում է այն բանին, որ Թուրքիան առնվազն տատանվում է միանալու ԴԱԻՇ-ի դեմ պայքարին»,- ասել է Չեխիայի նախագահը:
«Թուրքիան պետք է որոշի, թե ում միանա»,- նշել է նա և ավելացրել, որ ԴԱԻՇ-ի դեմ պայքարում խնդիրներից մեկը այն իրավիճակն է, որ որոշ երկրներ նրան «աջակցում են ֆինանսապես և այլ միջոցներով»: