ԱԺ պատգամավոր Թևան Պողոսյանը «Առաջին լրատվական»-ի հետ զրույցում, անդրադառնալով Հայաստան-ԵՄ հարաբերություների նոր փուլին, նշեց.
«Ճնշումների ներքո Հայաստանը ստիպված էր Ասոցացման համաձայնագրի ստորագրումից հետ կանգնելու և նույնիսկ անդամակցելու ԵՏՄ-ին, այնուամենայնիվ, երկու կողմի մոտ էլ մնում էր այն գիտակցությունը, որ հարաբերությունները պետք է շարունակել: Ես ուրախ եմ, որ հնարավորություն է ընձեռվել նոր իրավական փաստաթղթի շուրջ բանակցելու»: Նա նաև հավելեց, որ դեկտեմբերի 7-ից հետո բանակցությունների մեկնարկը կլինի և երկար ժամանակ չի պահանջվի փաստաթուղթն ստորագրելու համար:
Հարցին՝ Ռուսաստանի ճնշումներից այս անգամ հնարավոր կլինի՞ խուսափել, Թևան Պողոսյանը պատասխանեց՝ «Սեպտեմբերի 3-ի դասերը քաղել են բոլորը, և՛ Հայաստանը, և՛ ԵՄ-ն, և թույլ չեն տա, որ ձևավորվի այնպիսի իրավիճակ, որ նորից այս հարաբերություններն ինչ-որ չափով անցնեն քաղաքական առճակատումների դաշտ»:
Թ. Պողոսյանի դիտարկմամբ՝ ԵՄ-ն, անվտանգություն ասելով, դժվար թե նկատի ունենա ռազմական կոմպոնենտի շրջանակը. «Հայաստանը ԵՄ-ի հետ կարող է տարբեր բարեփոխումներ անել՝ կապված ներքին անվտանգության խնդիրների հետ, այլ ոչ թե արտաքին: Անվտանգությունը նաև ոստիկանության, դատախազության, արտակարգ իրավիճակների շրջանակներն են, որտեղ Հայաստանը կարող է բարեփոխումներ իրականացնել»:
Մանրամասները՝ տեսանյութում:
