Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ ավարտվեց Համլետ Գ.-ի գործի դատական քննությունը:
Ըստ մեղադրանքի՝ 25-ամյա Համլետը 2015 թվականի մարտի 19-ին իր ընկերուհու բնակարանում, վերջինիս գունավոր լազերային տպիչի միջոցով պատճենահանման եղանակով պատրաստել է 9 հատ 1000 դրամանոց, 4 հատ 5 հազար դրամանոց կեղծ թղթադրամներ:
Հաջորդ օրը՝ 2015 թվականի մարտի 20-ի ուշ երեկոյան, Համլետն ընկերոջն առաջարկել է գնալ մարմնավաճառի մոտ ու զվարճանալ:
Երիտասարդները գնացել են Բագրատունյաց պողոտա:
Մոտեցել են մարմնավաճառությամբ զբաղվող Էլմիրա Խ.-ին ու պայմանավորվել են, որ նա 25 հազար դրամով սեռական հարաբերություն ունենա երկու երիտասարդի հետ: Այդ գումարի մեջ մտնում էր նաև հյուրանոցի սենյակի վարձը՝ 5 հազար դրամը:
Պայմանավորվելուց հետո եռյակը ոտքով գնացել է մոտակա՝ Չեխովի 30 հասցեում գործող «Բաղնիք» հյուրանոց:
Ճանապարհին Համլետը 4 հատ 5 հազարանոց ու 5 հատ հազարանոց կեղծ թղթադրամները տվել է մարմնավաճառուհուն: Վերջինս թղթադրամները անփութորեն դրել է պայուսակի մեջ:
4 հատ կեղծ հազարանոց թղթադրամները Համլետը պահել է իր մոտ:
Հյուրանոցում սենյակ են վերցրել: Մատուցողուհին պահանջել է, որ սենյակի վարձը վճարեն սկզբից:
Մարմնավաճառուհին իրեն տրված կեղծ թղթադրամների միջից հանել մի հինգ հազարանոցը:
Համլետը մարմնավաճառուհու ձեռքից վերցրել է թղթադրամը, անձամբ է մոտեցել դռան մոտ կանգնած մատուցողուհուն:
Սենյակում գտնվող մարմնավաճառուհին և Համլետի ընկերը լսել են մատուցողուհու ձայնը, ով ասել է՝ ի՞նչ փող եք տալիս, սա կեղծ է:
Մարմնավաճառուհին անմիջապես հանել է իր մոտ եղած թղթադրամները՝ 20 հազար դրամ ընդհանուր գումարը, և տեսել է, որ իր մոտ եղած թղթադրամներն էլ են կեղծ՝ դրանք պաշտպանիչ ժապավեն չեն ունեցել:
Համլետը նրանց ասել է, թե ինքն էլ է խաբվել, այդ թղթադրամները, իբր, իրեն տվել են բուքմեյքերական գրասենյակում:
Երբ դուրս են եկել հյուրանոցից, Համլետն ու մարմնավաճառուհին «պատահաբար» հանդիպել են նաև փողոցում, իսկ քիչ անց նրանց են մոտեցել ոստիկաններն ու երկուսին էլ բերման են ենթարկել ոստիկանություն:
Համլետ Գաբրիելյանին մեղադրանք է առաջադրվել ՀՀ քրեական օրենսգրքի 202 հոդվածի 1-ին մասով: Նրա նկատմամբ կիրառվել է այլընտրանքային խափանման միջոց՝ գրավ՝ իսկական փողով՝ 1 միլիոն դրամով…
Դատական քննության սկզբում Համլետը, առաջադրված մեղադրանքը չընդունելով՝ պնդում էր, թե ինքը ոչ թե կեղծ փող է իրացրել, այլ փորձել է «պատժել» մարմնավաճառուհի Էլմիրային:
Ըստ Համլետի՝ դեպքից մի քանի օր առաջ ինքը ցանկացել էր օգտվել մարմնավաճառուհու ծառայություններից: Գնացել էր Բագրատունյաց պողոտա, մոտեցել էր մարմնավաճառուհի Էլմիրային:
Վերջինս իր ծառայությունների համար շատ մեծ գումար էր պահանջել՝ 10 հազար դրամ: Համլետն Էլմիրային առաջարկել էր իր մոտի գումարով բավարարվել, բայց մարմնավաճառուհին խոսել էր վիրավորական, նույնիսկ արհամարհական տոնով:
Համլետն իր արժանապատվությունը խոցված էր համարել, չէր օգտվել մարմնավաճառուհու ծառայություններից, բայց որոշել էր «պատժել» նրան, «քթից բերել»:
Եվ նա վճռել էր… կեղծ փողով վճարել նույն մարմնավաճառուհուն՝ օգտվելով նրա ծառայություններից: Դեռ ընկերոջն էլ էր հրավիրել…
Իր դատաքննական ցուցմունքում Համլետն ասել է. «Ես փողը տպելիս չեմ կենտրոնացել, թե ինչքան եմ տպում: Երբ վերջացրել եմ, հաշվել-տեսել եմ՝ 29 հազար է: Ես կեղծ փողի կարիքը չունեի, ես կարող եմ իմ գումարը աշխատանքով վաստակել… Եթե մարմնավաճառը 10 հազար դրամ էր պահանջել, մտածել եմ՝ մի 10 հազարով էլ… աղայություն կանեմ… Իսկ մնացած 9 հազարով աղբարկղին պիտի աղայություն անեի… »:
Համլետը դատարանում նաև այն կարծիքը հայտնեց, թե «մարմնավաճառից ամեն բան սպասելի է», ինքն ավել փող է տպել զուտ նրա համար, որ չհասնի մարմնավաճառի մոտ ու հանկարծ պարզվի՝ փողը նորից քիչ է…
Դատական վիճաբանությունների փուլում, լսելով դատախազի ճառը՝ իրական ազատազրկման պահանջով, Համլետը փոխեց դիրքորոշումը:
Նա իրեն լիովին մեղավոր ճանաչեց, ընդունեց մեղքը և զղջաց կատարածի համար: Համլետն ասաց, թե հասարակությանը պիտանի անդամ է, իսկ հետայսու՝ քաղելով համապատասխան դասերը, միայն օրինապաշտ է լինելու, այլևս՝ ո՛չ մի սայթաքում…
Դատարանը Համլետ Գ.-ին մեղավոր ճանաչեց ՀՀ քրեական օրենսգրքի 202 հոդվածի 1-ին մասով, դատապարտեց 3 տարի ազատազրկման, պայմանական դատապարտություն կիրառեց ու սահմանեց 2 տարի փորձաշրջան:
