Ֆուտբոլի Հայաստանի Բարձրագույն խմբի 15-րդ տուրում տեղի ունեցան «Բանանց» – «Միկա» և «Շիրակ» – «Գանձասար-Կապան» հանդիպումները:
Գյումրիի «Քաղաքային» մարզադաշտում տանտերերին հաջողվեց առավելության հասնել Կապանը ներկայացնող «Գանձասար»-ի նկատմամբ: 11-րդ րոպեին «Շիրակ»-ի ֆուտբոլիստ Դավիթ Հակոբյանը կարողացավ օգտվել մրցակցի պաշտպանների սխալից ու դիպուկ հարված կատարել՝ հաշվի մեջ առաջ մղելով տանտերերին: Խաղի վերջնամասում՝ 82-րդ րոպեին, հյուրերի ֆուտբոլիստ Գեղամ Հարությունյանը գլխի հարվածով կարողացավ հավասարեցնել հաշիվը, սակայն 3 րոպե հետո Գյումրու ակումբի ֆուտբոլիստ Վիուլեն Այվազյանը նորից առաջ մղեց տանտերերին: Հանդիպումն այսպես էլ ավարտվեց՝ 2:1՝ հօգուտ «Շիրակ»-ին:
Տուրի մյուս խաղում «Բանանց-1» մարզադաշտում «Բանանց»-ն ընդունեց «Միկա»-ին: Հանդիպման 9-րդ րոպեին տանտերերի ֆուտբոլիստ Վահագն Այվազյանը կարողացավ դիպուկ հարվածով գնդակն ուղարկել Արսեն Բեգլարյանի պաշտպանած դարպասը: 19-րդ րոպեին «Միկա»-ի ֆուտբոլիստ Սամվել Մելքոնյանը կարողացավ արդյունավետ օգտագործել տուգանայինից կատարած փոխանցումն ու հավասարեցնել հաշիվը: Խաղն այսպես էլ ավարտվեց՝ 1:1:
Այսպիսով՝ 15-րդ տուրից հետո «Ալաշկերտ»-ը 32 միավորով գլխավորում է մրցաշարային աղյուսակը, «Փյունիկ»-ը 30 միավորով երկրորդ տեղում է, նրան հաջորդում է «Արարատ»-ը՝ 25 միավորով: «Շիրակ»-ը 24 միավորով չորրորդն է, «Գանձասար-Կապան»-ը 22 միավորով՝ հինգերորդը: «Միկա»-ն ու «Բանանց»-ը 14 միավորով կիսում են 6-7-րդ հորիզոնականները: Իսկ ահա առաջնությունում ոչ մի հաղթանակ չտոնած «Ուլիս»-ը 2 միավորով եզրափակում է մրցաշարային աղյուսակը:
