Սյունիքի մարզի ընդհանուր իրավասության դատարանում ընթանում է Արտուր Մ.-ի գործի դատական քննությունը:
23-ամյա Արտուրը մեղադրվում է ուրիշի գույքի բացահայտ հափշտակություն՝ կողոպուտ կատարելու համար՝ ՀՀ քրեական օրենսգրքի 176 հոդվածի 2-րդ մասի 2-րդ,4-րդ կետերով:
Տուժողը՝ Ջինգ Մինգուանի Շուն, Չինաստանի քաղաքացուհի է:
Ըստ մեղադրանքի՝ 2015 թվականի սեպտեմբերի 14-ին, ժամը 13-ի սահմաններում Արտուրն իր անձնական օգտագործման մեքենայով չինուհուն Կապանից տանում էր Մեղրի:
Ճանապարհին Արտուրը կանգնեցրել է մեքենան, չինուհուն խաբել է, թե մեքենան խափանվել է, ու խնդրել է, որ չինուհին իջնի ու հրի մեքենան:
Քաղաքավարի չինուհին չի մերժել, իր անձնական իրերը թողել է մեքենայի մեջ և իջել է, որ մեքենան հրի:
Ըստ մեղադրանքի՝ այդ ժամանակ Արտուրը չինուհու կյանքի համար ոչ վտանգավոր բռնություն է գործադրել՝ կտրուկ հետընթաց է կատարել, մեքենայով թեթևակի հարվածել, վայր է գցել պատրաստակամ չինուհուն՝ պատճառելով թեթև վնասի հատկանիշներ չպարունակող վնասվածք:
Ապա Արտուրը մեքենայով առաջ է սլացել ու փախել է՝ հափշտակելով չինուհու՝ խոշոր չափերի անձնական իրերն ու դրամը:
Արտուր Մ.-ի խափանման միջոցը կալանավորումն է: