Գերմանիայի Դյուսելդորֆ քաղաքում բռնցքամարտի գերծանր քաշային կարգում WBA (Super), WBO և IBF վարկածներով աշխարհի արդեն նախկին չեմպիոն ուկրաինացի Վլադիմիր Կլիչկոն(64-4, 53 նոկաուտ) մենամարտեց բրիտանացի Թայսոն Ֆյուրիի(25-0, 18 նոկաուտ) հետ:
Բրիտանացի բռնցքամարտիկը մրցավարական անձնակազմի միաձայն որոշմամբ(115-112, 115-112, 116-111) հաղթող ճանաչվեց այս մենամարտում՝ դառնալով գերծանր քաշային կարգում WBA (Super), WBO և IBF վարկածներով աշխարհի նորաթուխ չեմպիոնը:
Հատկանշական է, որ Վլադիմիր Կլիչկոյի համար 11 տարի դադարից հետո սա առաջին պարտությունն էր: Ինչ վերաբերում է Թայսոն Ֆյուրիին, բրիտանացին շարունակում է հաղթարշավը: Իր անցկացրած բոլոր 25 մենամարտերում Թայսոնը հաղթող է ճանաչվել՝ նոկաուտի հասնելով 18-ում: Վլադիմիր Կլիչկոյի համար այս պարտությունը չորրորդն էր պրոֆեսիոնալ բռնցքամարտում:
Մենամարտից հետո Կլիչկոն հայտարարել է, որ չգիտեր ինչպես հաղթել Ֆյուրիին, սակայն դա միայն այսօր էր: Նա վստահ է, որ ռևանշ մենամարտի ժամանակ կկարողանա հաղթել Թայսոն Ֆյուրիին:
Իսկ ահա Թայսոն Ֆյուրին պարզապես յոթերորդ երկնքում է այս հաղթանակից հետո: Նա հայտարարել է, որ իր երազանքն է կատարվել. «Վեց ամիս՝ ամեն օր, ես մարզվել եմ և չեմ կարողանում հավատալ, որ այսօր սա տեղի ունեցավ»:
