Կենտրոն և Նորք-Մարաշ վարչական շրջանների ընդհանուր իրավասության դատարանում Մեսրոպ Մակյանի նախագահությամբ ավարտվեց Վահե և Անդրանիկ Մարտիրոսյանների գործի դատական քննությունը:
22-ամյա Վահեն և 27-ամյա Անդրանիկը հորեղբորորդիներ են: Նրանք մեղադրվում են նույն խմբի կազմում տուժողի առողջությանը խուլիգանական դրդումներով ծանր վնաս հասցնելու համար՝ ՀՀ քրեական օրենսգրքի 112 հոդվածի 2-րդ մասի 6-րդ և 9-րդ կետերով, ինչպես նաև որպես զենք գործածված առարկաների՝ սպորտային ծեծանակի՝ «բիտայի» ու դանակի գործադրմամբ կատարած խուլիգանության համար՝ ՀՀ քրեական օրենսգրքի 258 հոդվածի 4-րդ մասով:
Վահեն մեղսագրված արարքի կատարման պահին եղել է ժամկետային զինծառայության մեջ, կոչումով՝ շարքային: Այդ պատճառով գործի քննությունը կատարել է զինվորական դատախազությունը, մեղադրանքը դատարանում պաշտպանում էր զինվորական դատախազության դատախազ Վ. Հարությունյանը:
Տուժողները 5 երիտասարդներ են, գործընկերներ:
Դատարանը հաստատված է գնահատել, որ 2014 թվականի հունիսի 6-ին, ժամը 22-ի սահմաններում գործով տուժող Արմեն Գ.-ն իր գործընկերներ, տուժողներ Արթուրի, Վազգենի, Արսենի ու Վահագնի հետ գնացել է ՀՀ ազգային գրադարանի դիմաց գտնվող «Կալիենտե» պարային ակումբ՝ իր ծնունդը նշելու:
Արմենն ու նրա ընկերները տեղավորվել են պարասրահի վերջնամասում գտնվող սեղանի շուրջ:
«Կալիենտե» ակումբում ժամանակ էին անցկացնում նաև հորեղբորորդիներ՝ Վահե և Անդրանիկ Մարտիրոսյանները, ինչպես նաև 20-25 այլ հաճախորդներ:
Ժամը 23-ն անց 50-ի սահմաններում Վահագնն ու Արթուրը դուրս են եկել ակումբից՝ ծանոթ աղջիկներին դիմավորելու, միասին նորից ակումբ վերադառնալու և ուրախ ժամանակ անցկացնելու համար: Սակայն ակումբ մտնելու պահին աղջիկներից մեկը ի դեմս ակումբի անվտանգության աշխատակցի՝ ճանաչել է իր ամուսնու ազգականին ու նրա հետ հանդիպումից խուսափելով՝ անմիջապես դուրս է եկել ակումբից: Նրա ընկերուհին ու երկու երիտասարդները գնացել են նրա հետևից: Տղաները ցանկացել են տաքսի կանգնեցնել ու աղջիկներին ճանապարհել տուն:
Նույն ժամանակահատվածում Արմենն ակումբում մնացած երկու ընկերների հետ շարունակել է զվարճանալ: Ուղիղ կեսգիշերին Վազգենը շամպայն է պատվիրել, նրանք կտրել են իրենց տարած տորթը: «Արարողությունը» նրանց հեռախոսով ու նրանց խնդրանքով նկարահանել է ակումբի մատուցողուհին:
Վազգենը շամպայնը բացել ու շշի պարունակությունը լցրել է պարահրապարակում պարող Արմենի վրա՝ այդ կերպ շնորհավորելով նրա ծննդյան օրը: Արսենը Վազգենի ձեռքից վերցրել է շամպայնի շիշը ու շամպայնը «պզզըցրել է» Արմենի վրա:
Շամպայնը ցայտել է ոչ միայն հոբելյարի, այլև ակումբի մյուս այցելուների, այդ թվում՝ պարահրապարակում գտնվող Վահե Մարտիրոսյանի վրա:
Մարտիրոսյաններին դա դուր չի եկել: Անդրանիկ Մարտիրոսյանը սկսել է այդ թեմայով խոսել Արմենի հետ, ապա նրա ու Վազգենի հետ դուրս է եկել ակումբից:
Նրանց հետևից դուրս է եկել նաև Արսենը:
Արմեն Գ.-ն Անդրանիկին ասել է, թե իր ծննդյան օրն է, տղաներն այդպես են շնորհավորել: Նա ներողություն է խնդրել շամպայն ցայտեցնելու համար: Անդրանիկն էլ շնորհավորել է Արմենին, սակայն… հեփի էնդ չի եղել, քանի որ այդ պահին ակումբից դուրս է եկել Վահե Մարտիրոսյանն ու գոռալով, վիրավորական ձևով դիմել է Արմենին ու նրա ընկերներին:
Վազգենը նրան դիտողություն է արել: Վահեն մոտեցել ու բռունցքով հարվածել է Վազգենի գլխին:
Վազգենը պատասխան հարված է հասցրել Վահեին: Դրանից հետո վերջինս շարունակել է բռունցքներով հարվածներ հասցնել Վազգենին:
Վահեի սկսած կռվին միացել են նաև Անդրանիկ Մարտիրոսյանն ու գործով չպարզված ևս երկու անձինք: Նրանք ծեծի են ենթարկել Վազգենին ու նրա ընկերներին:
Այդ ընթացքում, ըստ դատական ակտի, Վահեն ակումբի բակում կայանած իր «Նիվայի» միջից վերցրել է սպորտային ծեծանակը՝ բիտան, ու խուլիգանական գործողությունները շարունակել է այդ առարկայի գործադրմամբ, որով հարվածներ է հասցրել տուժողներին:
Այդ ժամանակ Աբովյան փողոցում գտնվող Վահագնն ու Արթուրը, կռվի աղմուկը լսելով ու ձայներից հասկանալով, որ իրենց ընկերները կռվի մեջ են, վազելով մոտեցել են կռվողներին, միջամտել ու ցանկացել են կռիվը դադարեցնել:
Սակայն Մարտիրոսյաններն ու նրանց ընկերները ոչ միայն չեն դադարեցրել իրենց գործողությունները, այլև սկսել են հարվածներ հասցնել նաև նոր մոտեցած Վահագնին ու Արթուրին:
Վահեն ծեծանակով շարունակել է հարվածներ հասցնել, խփել է Արթուրին ու Արմենին: Արթուրին պատճառել է ճակատոսկրի կոտրվածք՝ ծանր մարմնական վնասվածք, իսկ Արմենի առողջությանը պատճառել է միջին ծանրության վնաս՝ առողջության տևական քայքայումով:
Կռվի ընթացքում, ըստ դատական ակտի, Արթուրը բռունցքով հարվածել է Անդրանիկ Մարտիրոսյանին: Վերջինս գործադրել է իր մոտ եղած դանակը, դրանով հարվածել է Արթուրին ու նրան իր հերթին դարձյալ պատճառել է ծանր վնաս՝ կրծքավանդակի ձախ կես թափանցող ու չթափանցող վնասվածքներ:
Ստանալով տարբեր աստիճանի մարմնական վնասվածքներ՝ Արթուրն ու նրա ընկերները դիմել են փախուստի:
Արթուրը՝ ամբողջովին արյան մեջ, վազել է դեպի Տերյան փողոց, հասել է Տերյան-Կորյուն խաչմերուկ:
Դատական ակտի համաձայն՝ շարունակելով իրենց խուլիգանական գործողությունները՝ Վահե Մարտիրոսյանը՝ ծեծանակը ձեռքին, իսկ Անդրանիկ Մարտիրոսյանը՝ դանակը ձեռքին, հայհոյանքներ տալով հետապնդել են կրկնակի անգամ ծանր վնասված Արթուրին:
Հետապնդումը եզրափակել է ակումբի անվտանգության աշխատողը, ով, իր ասելով, ցանկացել է հնարավոր բռնությունը կանխել:
Այդ պահին արյունլվա Արթուրին ու նրան հետապնդողներին բարեբախտաբար տեսել են ոստիկանության պարեկապահակային ծառայության հատուկ գումարտակի ծառայողները: Նրանց տեսնելով՝ հետապնդողները դադարեցրել են հետապնդումը:
Ոստիկանները կազմակերպել են ծանր վիրավորված Արթուրի տեղափոխումը հիվանդանոց:
Նրանք բռնել են Վահե Մարտիրոսյանին, նրա ձեռքից վերցրել են ծեծանակը: Վահեին ու ակումբի անվտանգության աշխատակցին տարել են ոստիկանության բաժին:
Անդրանիկ Մարտիրոսյանը հասցրել է դեպքի վայրից փախչել:
Դատարանում Վահե և Անդրանիկ Մարտիրոսյանները մեղսագրված արարքներում իրենց մեղավոր չեն ճանաչել:
Նրանք ասել են, թե իրենք, ինչպես նաև տուժողների խումբը, կռվել են անծանոթ, գործով այդպես էլ չբացահայտված երիտասարդների հետ: Իրենք ստիպված են կռվի մեջ մտել, որ պաշտպանվեն, քանի որ իրենց, առանց պատճառն ասելու, անխնա ծեծում էին ակումբի բակում:
Վահեն ասել է, թե իր հետ կռվող երեք անձանցից ոչ մեկը տուժողներից չի եղել: Ինքը փայտե մահակ չի ունեցել, մահակը գետնին ընկած է եղել, ինքը վերցրել է, որ ինչ-որ կերպ կարողանա պաշտպանվել: Այդ մահակով ինքը ոչ մեկին չի հարվածել:
Տերյան փողոցով ընթացող հետապնդումը տեսանկարահանող սարքով տեսանկարահանվել է, նյութը որպես իրեղեն ապացույց՝ հետազոտվել է դատարանում:
ԸստՎահեի՝ ինքը ոչ մեկին չի հետապնդել, փայտը ձեռքին քայլել է Տերյան փողոցով՝ փորձելով հեռացնել մի անծանոթի: Նրան ասում էր՝ ոչ թե՝ կանգնիր, կանգնիր, այլ՝ հեռո՛ւ գնա, մոտիկ չգաս: Այդ կերպ ինքը փորձում էր պաշտպանել իրեն ու եղբորը:
Վահեն նշել է, որ կռվի ժամանակ մարմնական վնասվածքներ ինքն էլ է ստացել, բայց գործով տուժող ճանաչված հինգ տղաների հետ ինքն ու Անդրանիկը չեն վիճել ու չեն կռվել, ավելին՝ դեպքից մինչ օրս իրեն ու Անդրանիկին հայտնի չէ, թե ի՞նչն է հանդիսացել այդ վիճաբանության առիթը…
Անդրանիկ Մարտիրոսյանը ևս իրեն մեղավոր չի ճանաչել: Նա ասել է, որ երբ ակումբում ծնունդ նշողները շամպայն են բացել ու լցրել հոբելյարի վրա, շամպայն է լցվել նաև մյուսների, այդ թվում՝ իր վրա: Ինքը գնացել է զուգարան՝ շամպայնի կաթիլները շապիկի ու դեմքի վրայից լվանալու համար: Հետո ակումբից դուրս է եկել՝ մաքուր օդ շնչելու: Բայց տեսել է, որ ակումբից մի քանի մետրի վրա մի խումբ մարդիկ վիճում են: Նրանց ձեռքերին փայտեր է նկատել: Կարծել է, թե Վահեն էլ է վիճողների մեջ, անմիջապես մոտեցել է, բայց հասկանալով, որ Վահեն նրանց մեջ չէ, ցանկացել է ակումբ վերադառնալ: Այդ ժամանակ մի անծանոթ բռնել է իր պարանոցից ու հարվածներ է հասցրել իր գլխին: Ինքը գետնին է ընկել: Այդ անծանոթը շատ հաղթանդամ էր, տուժողների մեջ այդպիսին չկա: Ինքը գետնից վեր է կացել ու, գլխին ստացած հարվածներից լինելով ոչ ադեկվատ վիճակում, վազվզել է տարբեր՝ անկանոն ուղղություններով:
Անդրանիկը պնդել է, թե վիճաբանողների մեջ տուժողներից ոչ մեկին չի տեսել: Ինքը ոչ մեկին չի խփել, չի հայհոյել: Իր ձեռքին կտրող-ծակող որևէ առարկա չի եղել: Միայն հեռախոս է եղել մոտը:
Դատարանը, հետազոտելով գործով ձեռք բերված ապացույցները, այդ թվում՝ տեսանկարահանող սարքերի կողմից նկարահանված նյութը, լսելով կողմերի դատաքննական ցուցմունքները, դրանք համադրելով նախաքննական ցուցմունքների հետ, եկել է եզրահանգման, որ Վահե և Անդրանիկ Մարտիրոսյանները մեղավոր են իրենց մեղսագրված արարքների համար:
Վահե և Անդրանիկ Մարտիրոսյանները մեղավոր են ճանաչվել ՀՀ քրեական օրենսգրքի 112 հոդվածի 2-րդ մասի 6-րդ և 9-րդ կետերով, 258 հոդվածի 4-րդ մասով:
Նրանք դատապարտվել են 6-ական տարի ազատազրկման:
Վահե Մարտիրոսյանի պատժի սկիզբը կհաշվվի 2014 թվականի հունիսի 7-ից, իսկ Անդրանիկ Մարտիրոսյանի պատժի սկիզբը՝ 2015 թվականի հունվարի Մարտիրոսյանի պատժի սկիզբը՝ ել ՀՀ քրեական օրենսգրքիների հետ, եկել է եզրահանգման, որ Վահե և Անդրաիկ Մսելով կողմե15-ից:
Նրանցից համապարտության կարգով հօգուտ պետբյուջեի կբռնագանձվի 542 հազար 20 դրամ՝ որպես դատական ծախսեր:
