Թուրքիայի Դիարբեքիր նահանգի Սուր գավառում լրագրողների մոտ հայտարարություն անող Դիարբեքիրի փաստաբանների միության ղեկավար Թահիր Էլչին զոհվել է այդ տարածքում հնչած կրակոցներից: Այս մասին հայտնում է «Ակոս» պարբերականը:
Թուրքիայի ժամանակով 11.00-ին Թահիր Էլչին հայտարարություն անելիս է եղել, երբ անհայտ անձինք հայտնվել են և սկսել են կրակել: Փամփուշտներից մեկը դիպչել է Էլչիի գլխին, ինչի հետևանքով նա մահացել է:
Զոհվել է նաև մեկ ոստիկան, ևս երեքը վիրավորվել են:
Սպանությունից րոպեներ առաջ Սուրում Էլչին հավաքվածների ներկայությամբ ասել է. «Այս պատմական տարածքում, շատ քաղաքակրթությունների օրրանը դարձած այս հնագույն տարածքում այլևս չենք ուզում զենք, բախումներ ու գործողություններ: Թող պատերազմները, կռիվները, զենքերն այս տարածքից հեռու լինեն»:
Դիրաբեքիրի փաստաբանների միությունը կատարվածից հետո «Թվիթեր»-ում գրառում է կատարել` հայտնելով, որ Էլչիին մտադրված սպանել են:
Թահիր էլչիի սպանության առնչությամբ խոսել է նաև նախագահ Ռեջեփ Թայիփ Էրդողանը` ասելով. «Էլչիի և զոհված ոստիկանի համար Աստծուց հոգու հանգստություն եմ խնդրում: Այս դեպքը ցույց է տալիս, թե որքան ճիշտ է ահաբեկչության դեմ պայքարելու հարցում Թուրքիայի վճռականությունը»: