Սահմանադրական փոփոխություններին ընդառաջ՝ Երևանում ու հանրապետության բոլոր քաղաքներում ու գյուղերում ընթանում է քարոզչական գործընթաց: Եթե փոփոխություններին «ոչ» ասող քաղաքական ուժերը ռեսուրսների սակավության հետևանքով չունեն քարոզչական շտաբներ հանրապետության ողջ տարածքում, ապա փոփոխություններին կողմ ուժերի, մասնավորապես՝ հանրապետականների «ասա այո» պաստառներին կարելի է հանդիպել գրեթե ամենուր: Սակայն մի շարք գյուղերում կատարած մեր շրջայցերը եկան ապացուցելու, որ «այո» մատնանշող պաստառը դեռ չի նշանակում, որ տվյալ տարածքում գործող, առավել ևս հասարակությանը նախագծին ծանոթացնելու գործառույթ կատարող շտաբ կա:
Արագածոտնի մարզկենտրոն կատարած մեր հերթական շրջայցը քիչ էր տարբերվում նախորդներից: Այստեղ քաղաքացիների հետ զրույցից հասկացանք, որ շատերը ընդհանրապես տեղյակ չեն, թե ինչ փոփոխություններ են նախատեսված կատարել մայր օրենքում, մի մասն էլ վստահեցրեց՝ Աշտարակում «այո» ասող դժվար թե լինի:
Քաղաքացիների ցածր իրազեկվածության աստիճանի պատճառները փորձեցինք ճշտել հենց քարոզիչներից, սակայն «Այո»-ի շտաբ կատարած մեր այցելությունը ապարդյուն անցավ, դուռը փակ էր, ներսում էլ մարդ չկար:
Որոշեցինք զրուցել Արագածոտնի մարզպետ Սարգիս Սահակյանի հետ: Սակայն իշխող Հանրապետական կուսակցության Արագածոտնի մարզի քարոզչական շտաբի պետ մարզպետը չպատասխանեց մեր հարցերին՝ չցանկանալով խոսել տեսախցիկի առջև: Նա միայն նշեց, որ Արագածոտնի մարզում, մասնավորապես՝ Աշտարակում ակտիվ քարոզչական գործընթաց է:
Այցելեցինք նաև Աշտարակի միակ «Ոչ»-ի քարոզչական շտաբ: Շտաբում վստահ են՝ չնայած օգտագործվում են մի շարք վարչական լծակներ, բայց միևնույն է՝ քաղաքացիների մեծ մասը «ոչ» է ասելու սահմանադրական փոփոխությունների նախագծին:
Աշտարակից ոչ հեռու Օշական գյուղի գյուղապետարանում տեղակայված «Այո»-ի շտաբում ևս մեզ վստահեցրին, որ գյուղում ընթանում է ակտիվ քարոզարշավ, և մեծ մասը կողմ է սահմանադրական փոփոխություններին:
Սակայն գյուղապետարանից դուրս բոլորովին այլ պատկեր էր:
