Թուրքիայի նախագահ Ռեջեփ Թայիփ Էրդողանը Բալըքեսիր քաղաքում շաբաթ օրը տեղի ունեցած ցույցի ժամանակ հայտարարել է, որ ինքը վշտացած է թուրքական ռազմաօդային ուժերի կողմից ռուսական «Սու-24» ինքնաթիռի կործանման կապակցությամբ: Այս մասին հայտնում է The Associated Press-ը:
«Մենք չէինք ցանկանում, որ դա տեղի ունենար, բայց տեղի ունեցավ: Հուսով եմ, որ նման բան կրկին տեղի չի ունենա»,- ասել է նախագահը:
Նա նշել է, որ Անկարան և Մոսկվան պետք է ավելի դրական մոտեցում ցուցաբերեն միջադեպի կապակցությամբ:
Էրդողանը նաև կրկին հայտնել է, որ Փարիզում կլիմայի հարցերով գագաթնաժողովի շրջանակներում կցանկանար հանդիպել Ռուսաստանի նախագահ Վլադիմիր Պուտինին, քանի որ երկու երկրների առաջնորդների հանդիպումը, նրա կարծիքով, հնարավորություն կտա թուլացնել լարվածությունը:
Միաժամանակ AP գործակալությունը նշում է, որ իր ելույթի ժամանակ Թուրքիայի նախագահը կրկին պաշտպանել է Թուրքիայի գործողությունները և քննադատել Սիրիայում Ռուսաստանի քաղաքականությունը: