Թուրքական T24 առցանց թերթի փոխանցամբ՝ թուրքական մամուլը մեծապես անդրադարձել է Cumhuriyet թերթի գլխավոր խմբագիր Ջան Դյունդարին ու Անկարայում թերթի ներկայացուցիչ Էրդեմ Գյուլի երեկվա կալանավորմանը, ինչի համար պատճառ է դարձել, որ նրանք լուսանկարներ են հրապարակել Թուրքիայի Ազգային հետախուզական կազմակերպության (MIT) կողմից բեռնատարներով Սիրիա զենք ուղարկելու փորձի մասին։
Լրագրողների կալանավորումը դատապարտել են թուրքական 12 թերթերի 46 ներկայացուցիչներ, որոնց թվում կան նաև այնպիսիք, որոնք նույնպես հայտնվել են կալանավորման վտանգի տակ։
Իրենց հրապարակումներում լրագրողները շեշտադրում են հետևյալը. «Մենք լրտես չենք, դավաճան չենք, հերոս չենք։ Մենք պարզապես լրագրող ենք, և այստեղ իրականացնում ենք լրագրողական գործունեություն»։
Լրագրողները խստապես դատապարտել են իրենց գործընկերների կալանավորումները։ Նրանք վրդովմունք են հայտնել, որ «լուր» հրապարակելու պատճառով Դյունդարին ու Գյուլին մեղադրել են «լրտեսական գործունեության», «ահաբեկչական զինված խմբավորման անդամ հանդիսանալու» համար։
Նրանք հիշեցրել են, որ Nokta պարբերականի ղեկավարներին սպառնում է 20-ական տարի ազատազրկում, իսկ Today Zaman թերթի գլխավոր խմբագրին՝ 8 տարվա ազատազրկում, որ թվիթերյան մեկ գրառման համար հեղինակին դատապարտում են մեկ տարվա ազատազրկման (ԺՀԿ-ական պատգամավոր Սեզգին Թանրըքուլուն հոկտեմբերին հայտարարել էր, որ Թուրքիայում ավելի շատ են թվիթների համար կալանավորվածները, քան ԴԱԻՇ-ին անդամակցելու համար կալանավորվածները.- 1in.am)։
Hürriyet թերթի սյունակագիր Էրթուղրուլ Օզքյոքը, որին Թուրքիայի նախագահ Ռեջեփ Էրդողանին «վիրավորելու» համար, սպառնում է ավելի քան 5 տարվա ազատազրկում, Էրդողանին հիշեցրել է, որ նա մեկ բանաստեղծություն ընթերցելու համար նախկինում ազատազրկվել է 3.5 ամիս ժամկետով, ինչն էլ խորը հետք է թողել նրա վրա։
Հիշեցնենք, որ 1997 թվականի փետրվարի 28-ին Թուրքիայում անցկացված հետմոդեռնիստական (թավշյա) հեղաշրջումից հետո՝ հունիսի վերջին Նեջմեթթին Էրբաքանի կոալիցիոն կառավարությունը ստիպված էր հրաժարական տալ, իսկ 1998 թվականի հունվարին Թուրքիայի Սահմանադրական դատարանը որոշում կայացրեց «Ռեֆահ» կուսակցությունը ցրելու մասին:
«Ռեֆահի» առաջնորդներից Ռեջեփ Էրդողանը, որն այն ժամանակ զբաղեցնում էր Ստամբուլի քաղաքապետի պաշտոնը, ստիպված էր բանտում 4 ամիս անցկացնել ցույցի ժամանակ իսլամիստական տրամադրություններ արտահայտելու համար. «Մինարեները մեր սվիններն են, գմբեթները` մեր սաղավարտները, մզկիթները մեր զորանոցներն են, իսկ հավատացյալները` մեր զինվորները»:
1998 թվականի փետրվարի 21-ին թուրքական դատարանը կրոնական ու ռասիստական ատելություն բորբոքելու համար Քրեական օրենսգրքի 312-րդ հոդվածի 2-րդ կետով Էրդողանին դատապարտեց մեկամյա բանտարկության և նշանակեց 860 միլիոն (հին) թուրքական լիրա տուգանք: Էրդողանի բողոքարկումից հետո նախ այդ պատժաչափը նվազեցվեց մինչև 10 ամսվա, իսկ տուգանքը՝ մոտ 177 միլիոնի, ապա Թուրքիայի Վճռաբեկ դատարանը 1998 թվականի սեպտեմբերի 24-ին վճռեց, որ Էրդողանը բանտում պետք է անցկացնի 4 ամիս:
Էրդողանը բանտից, ուր հայտնվել էր 1999 թվականի մարտի 26-ին, դուրս եկավ նույն թվականի հուլիսի 24-ին։ Ավելի ուշ Էրդողանը հայտարարեց, որ «Արդարություն ու զարգացում» կուսակցությունը (ԱԶԿ) ստեղծելու գաղափարն իր մոտ ծագել է բանտում անցկացրած ժամանակ։ ԱԶԿ-ն Թուրքիայում իշխանության է եկել 2002 թվականի նոյեմբերի 3-ին անցկացված խորհրդարանական ընտրությունների արդյունքներով։
