Արագածոտնի մարզի ընդհանուր իրավասության դատարանում Սուրեն Մնոյանի նախագահությամբ ավարտվել է Գևորգ Գ.-ի գործի քննությունը:
55-ամյա Գևորգին 2015 թվականի օգոստոսի 27-ին մեղադրանք էր առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Գևորգը մեղադրվել էր իր կնոջը՝ Գրետային (անունը փոխված է) սպանելու համար:
Ըստ մեղադրանքի՝ Գևորգը կնոջը կյանքից զրկել էր՝ վրդովված լինելով նրա անտարբեր վերաբերմունքից, մասնավորապես՝ նույն անկողնում իր հետ չքնելու հանգամանքից:
Առաջադրված մեղադրանքի համաձայն՝ 2015 թվականի օգոստոսի 25-ին, ժամը 22-ն անց 30-ի սահմաններում Գևորգը վերցրել է խոհանոցային դանակը, մտել է հյուրասենյակ, մոտեցել է այնտեղ դրված թախտին թիկունքով դեպի իրեն պառկած կնոջը և դանակով մեկ հարված է հասցրել կնոջ կրծքավանդակի աջ հատվածին՝ պատճառելով թափանցող վերք ու առաջացնելով սուր ներքին արյունահոսություն: Կինը հիվանդանոց տեղափոխելու ճանապարհին մահացել է:
2015 թվականի հոկտեմբերի 8-ին ստացվել է Գևորգ Գ.-ի նկատմամբ կատարված դատահոգեբուժական-դատահոգեբանական համալիր փորձաքննության եզրակացությունը, համաձայն որի՝ Գևորգ Գ.-ն դեռ 1999 թվականից տառապել է «Շիզոֆրենիա՝ պարանոիդ ձև, ցնորազառանցական համախտանիշ» հոգեկան հիվանդությամբ:
Կնոջը սպանելու պահին Գևորգը, ըստ փորձագիտական եզրակացության, գտնվել է հիվանդագին խանգարված վիճակում, արարքը կատարել է ցնորազառանցական ապրումների ազդեցության տակ, ինչը նրան զրկել է իր գործողությունների համար հաշիվ տալու, դրանք ղեկավարելու հնարավորությունից:
Փորձագիտական եզրակացությամբ Գևորգ Գ.-ն ճանաչվել է անմեղսունակ:
Նույն օրը վերացվել է Գևորգ Գ.-ի կալանավորումը, նրա նկատմամբ կիրառվել է անվտանգության միջոց՝ նա տեղավորվել է հոգեբուժական կլինիկայի հատուկ հսկողության բաժանմունք:
Քրեական օրենքով արգելված արարք կատարած անձ Գևորգ Գ.-ն դատարանում ընդունել է, որ դանակով հարվածել ու սպանել է կնոջը՝ Գրետային:
Գևորգի հարսը ցուցմունք է տվել, որ ամուսինը Գևորգի ու սպանված Գրետայի որդին է: Ինքն ու ամուսինը իրենց երեք անչափահաս երեխաների հետ գյուղում ապրել են ամուսնու ծնողների հետ համատեղ: Ինքն իմացել է, որ սկեսրայրը 15 տարի տառապել է հոգեկան հիվանդությամբ, նա հաշվառված է եղել բժշկական կենտրոնում:
2015 թվականի օգոստոսի 25-ին, ժամը 19-ի սահմաններում իր ամուսինը գնացել է հարևան գյուղ: Տանը մնացել են ինքը, երեք անչափահաս երեխաները, սկեսուրն ու սկեսրայրը:
Ժամը 20-ի սահմաններում ինքը հյուրասենյակում հեռուստացույց է դիտել: Այդ օրը Գևորգն անհանգիստ է եղել: Սկեսուրը քնել է հյուրասենյակի թախտի վրա:
Ինքը երեխաներին պառկեցրել է քնելու, հետո հյուրասենյակում հեռուստացույց է դիտել:
Գևորգը քնել է հյուրասենյակի կողքին գտնվող ննջասենյակում: Այդ ընթացքում Գևորգը հինգ րոպե ընդմիջումով երեք-չորս անգամ մտել է հյուրասենյակ, ծխախոտ է վառել ու դուրս է եկել:
Ինքը ժամը 22-ն անց 30-ի սահմաններում դուրս է եկել հյուրասենյակից, գնացել է իր սենյակ, որ քնի:
Այդ ժամանակ սկեսուրը քնած է եղել, իսկ Գևորգը գտնվում էր դրսում:
Ինքը մտել է իր սենյակ, նստել է մահճակալին ու 1-2 րոպե հետո լսել է սկեսուրի ձայնը՝ վախ, մեռա:
Ինքը շտապ մտել է հյուրասենյակ, տեսել է, որ Գրետան մեջքի վրա պառկած է թախտին: Մոտեցել, տեսել է, որ նրա հագի կանաչ սվիտերը արյունոտ է, ձախ կրծքային հատվածում պատռված տեղ կա՝ դանակի տեղն էր: Ինքը Գրետային հարցրել է՝ ի՞նչ է եղել, նա ասել է, թե Գևորգն է խփել:
Այդ ընթացքում տուն է եկել ամուսինը: Նա զանգահարել է շտապօգնություն:
Մոտ 10-15 րոպե անց եկել է շտապօգնությունը, Գրետային տեղափոխել են հիվանդանոց: Ամուսինը գնացել է նրա հետ…
Քիչ անց եկել են ոստիկանները, Գևորգը նրանց ցույց է տվել փակ պատշգամբում դրված խոհանոցային դանակը և ասել է, որ դրանով է խփել Գրետային:
Դատարանը հաստատված է համարել Գևորգ Գ.-ի կողմից ՀՀ քրեական օրենսգրքի 104 հոդվածի 1-ին մասով նախատեսված հանրորեն վտանգավոր արարքի կատարման փաստը, ինչպես նաև այն, որ Գևորգ Գ.-ն այդ արարքը կատարել է անմեղսունակության վիճակում, իր հոգեկան վիճակով նա վտանգավոր է իր և այլ անձանց համար:
Դատարանը որոշել է Գևորգ Գ.-ին ազատել քրեական պատասխանատվությունից, նրա նկատմամբ կիրառել է բժշկական բնույթի հարկադրանքի միջոց՝ բուժում հոգեբուժական հիվանդանոցի հատուկ տիպի բաժանմունքում:
