Գյումրիում այսօր «Նոր Հայաստան» փրկության ճակատը կազմակերպել էր իրազեկման հավաք-երթ, որին, ի թիվս այլ ընդդիմադիր գործիչների, մասնակցում էր նաև «Ժառանգություն» կուսակցության առաջնորդ Րաֆֆի Հովհաննիսյանը:
Ելույթից հետո լրագրողների հետ զրույցում Րաֆֆի Հովհաննիսյանն անդրադարձավ «Ժողովուրդ» թերթում տպագրված հոդվածին, հանձնաժողովի անդամների տեղերը ՀՀԿ-ին վաճառելու մասին լուրերին. «Այնտեղ ասել են, որ ես եմ վաճառել: Ավելի պարզունակ զրպարտություն, քան դա, չի կարող լինել, և ես չեմ հասկանում որևէ ներողություն: Նա, ով ընթերցի այդ նույն հոդվածը, այդ նույն թերթի 4-րդ էջում կտեսնի, որ դա այն 118 տեղերից մեկն էր, որտեղ մենք չհասցրեցինք ներկայացնել մեր ներկայացուցչին, ուստի և հանձնաժողովի նախագահի կողմից վիճակահանությամբ նշանակվեց ինչ-որ մեկը, որը մեզ հետ կապ չունի: Դա իհարկե մեր բացթողումն է, մենք 2000-ից 118 տեղ չկարողացանք մեր ներկայացուցչին ներկայացնել:
Ես կարծում եմ, որ դուք կդատապարտեք ձեր գործընկերներին և թույլ չեք տա, որ ձեր աշխատանքի մեջ նույնպես նման մակարդակ լինի. սուտ, զրպարտիչ լուր են հայտնում: Ճշմարտությունն այն է, որ եթե վաճառք կա, վաճառք բառը պատկանում է այս կեղծ իշխանություններին, վաճառք նման թերթիկներին և խմբագիրներին, որ սուտ, անհիմն, կեղտոտ լուրեր են տարածում: Միգուցե դա ծրագրված է ինչ-որ շրջանակների կողմից, միգուցե դա իրենց փնթիություն է, ես չգիտեմ»:
Մանրամասները՝ տեսանյութում: