Ամերիկյան The Wall Street Journal (WSJ) պարբերականի փոխանցմամբ՝ ԱՄՆ նախագահ Բարաք Օբամայի վարչակազմը ճնշում է գործադրում Թուրքիայի իշխանությունների վրա, որպեսզի հասնի թուրք-սիրիական սահմանի փակմանը, որի միջոցով ԴԱԻՇ-ն ուղարկում է իր զինյալներին։
Այդ մասին լրատվամիջոցին հայտնել են Սպիտակ տանն առկա աղբյուրները։ WSJ-ի զրուցակիցներից մեկը հայտնել է, որ ԱՄՆ-ն Թուրքիայից պահանջում է զինվորական կոնտինգենտ տեղակայել Սիրիայի հետ սահմանի 100 կիլոմետրանոց հատվածում, որի հակառակ կողմը վերահսկում է ԴԱԻՇ-ը։
Պենտագոնում կարծում են, որ դա անելու համար Թուրքիային անհրաժեշտ է մինչև 30.000 զինծառայող ու հրետանի։ ԱՄՆ-ում վստահ են, որ Թուրքիայի ռազմաօդային ուժերի կողմից ռուսական Սու-24 ինքնաթիռի խոցումը չի ազդի զորքեր տեղակայելու պլանների վրա։
ԱՄՆ-ը Թուրքիային զգուշացրել է, որ նրան ԵՄ-ից կսպասի լուրջ պատասխան, եթե չփակվի թուրք-սիրիական սահմանը, և ահաբեկիչները վերստին Թուրքիայի տարածքով հայտնվեն Եվրոպայում ու ահաբեկչություններ իրականացնեն։
Թուրքիայի վրա ճնշումն ուժեղացել է նոյեմբերի 13-ին Փարիզում իրականացված ահաբեկչություններից հետո։ Թուրքիային որպես օրինակ ցույց են տալիս քուրդ աշխարհազորայինների հաջողությունները, որոնք գործնականում կարողացել են կանգնեցնել իրաքյան սահմանի միջոցով օտար զինյալների մուտքը Սիրիա։