«Առաջին լրատվական»-ի տեղեկություններով՝ առաջիկայում վերջերս Հայաստանին հանձնված ռազմագերի Անդրանիկ Գրիգորյանի դեմ քրեական գործ կհարուցվի դասալքության համար, և վերջինս կդատապարտվի։ Հայկական կողմն այսպիսով ցանկանում է նախադեպ ստեղծել, որպեսզի հաջորդիվ հայկական կողմից ով գնա նման քայլի՝ գիտակցի հետևանքները։ Գիտակցի, որ հակառակորդին հանձնվելով կարող են հայտնվել ոչ թե երրորդ երկրում, այլ Հայաստանի բանտում։
Ի դեպ, մեզ հասած տեղեկություններով ադրբեջանական կողմն Անդրանիկ Գրիգորյանին հենց այնպես Հայաստանին չի հանձնել, այլ իրականում տեղի է ունեցել գերիների փոխանակում։ Գրիգորյանը փոխանակվել է Սաուդյան Արաբիայի մի սպայի հետ, որը զինվորական հրահանգիչ է եղել, որին հայկական կողմը ժամանակ առաջ բռնել էր Լեռնային Ղարաբաղում կոնկրետ հանձնարարություն կատարելիս։
Մեզ հասած տեղեկություններով, հայկական կողմն ադրբեջանական կողմի հետ սկզբում բանակցել է Վահան Մարտիրոսյանին և նրա ընտանիքին Հայաստան տեղափոխելու համար, սակայն ի վերջո որոշում է կայացվել՝ զինվորականին փոխանակել զինվորականի հետ։ Սակայն, ոչ Հայաստանը, ոչ էլ Ադրբեջանը տարբեր պատճառներով շահագրգռված չեն եղել հայտնելու, որ գերին Սաուդյան Արաբիայից է, և որ իրականում տեղի է ունենում գերիների փոխանակում։ Եվ հետո, Սաուդյան Արաբիայի իշխանություններն են Ադրբեջանի առաջ պահանջ դրել ճանապարհ գտնել իր զինվորին հետ վերադարձնելու համար։
Հիշեցնենք, որ Անդրանիկ Գրիգորյանն Ադրբեջանին հանձնվեց այս տարվա մարտի 22-ին ժամը 13:50-ի սահմաններում։ Նա լքելով զորամասը և զենք-զինամթերքը թողնելով մարտական դիրքում, սպիտակ դրոշը ծածանելով անցել էր առաջնային գիծը և հայտնվել հակառակորդի կողմում։ Ապա, թերևս, նաև ճնշումների տակ հայտարարել, որ ինքը զորամասում հրամանատարական կազմի կողմից բռնությունների է ենթարկվել։ Սակայն նոյեմբերի 18-ին, ժամը 13.30-ին ադրբեջանական կողմը ԼՂՀ-ին հանձնեց Գրիգորյանին Կարմիր խաչի առաքելության միջնորդությամբ Բաշ Քարվենդ բնակավայրի մոտ։
