Հանրապետական կուսակցությունից ԱՄՆ նախագահի թեկնածու Դոնալդ Թրամփի վարկանիշը կտրուկ ընկել է մեկ շաբաթից քիչ ժամանակում։ Այս մասին հայտնում է Reuters գործակալությունը՝ հղում անելով մարքեթինգային և սոցիոլոգիական հետազոտությունների Ipsos միջազգային ինստիտուտի հարցման տվյալներին։
Համաձայն հարցման՝ Թրամփի վարկանիշը 5 օրում ընկել է՝ 43 տոկոսից հասնելով 31 տոկոսի։
Վարկանիշի նման կտրուկ անկումը կապվում է միլիարդատիրոջ մեկնաբանությունների հետ, որոնք արվել են Փարիզի ահաբեկչություններից հետո։
Ավելի վաղ Թրամփը հայտարարել էր, որ նախագահ ընտրվելու դեպքում կսահմանի ԱՄՆ տարածքում բնակվող մուսուլմանների տվյալների հատուկ բազա։ Թրամփի կարծիքով՝ նաև ահաբեկիչների համար անհրաժեշտ է վերադարձնել ջրախեղդությամբ կտտանքները։ Քաղաքական գործիչը նաև պնդել է, որ մուսուլմաններն ԱՄՆ-ում ծափահարել են սեպտեմբերի 11-ի ահաբեկչությունների ժամանակ։
