Մարդու իրավունքների տեսանկյունից դրական է, որ Սահմանադրական դատարանն իր դիրքորոշմամբ Դատախազությանը պարտավորեցրել է հստակ ցուցումներ տալ քննիչի որոշումը վերացնելու դեպքում: Այսինքն, եթե գործը հսկող դատախազը նախկինում կարող էր առանց հստակ ցուցումների վերացնել քննիչի որոշումները, ապա հիմա դա կարող է անել միայն կոնկրետ պայմանների պահպանման դեպքում:
Այս մասին հաղորդագրությամբ է հանդես եկել ՀՀ մարդու իրավունքների պաշտպան Կարեն Անդրեասյանը՝ նկատելով, որ «բազմաթիվ դեպքերում մարդիկ անորոշ ժամկետով հայտնվում էին քրեական հետապնդման մեջ, քանի որ օրենսդրական բացի և առկա բացասական պրակտիկայի արդյունքում քննիչի մի շարք որոշումներ կարող էին մի քանի անգամ կամայականորեն վերացվել գործը հսկող դատախազի կողմից»:
Պաշտպանը հիշեցնում է, որ գործով Սահմանադրական դատարանն օրեր առաջ կայացրեց որոշում, որով պարզաբանեց Քննչական կոմիտեի և Դատախազության որոշ իրավասություններ, տվեց դիրքորոշումներ, որոնք, թեև կարևոր գործնական նշանակություն ունեն, սակայն, ցավոք հստակ և լիարժեքորեն չեն լուծում բարձրացված խնդիրը:
Ըստ Պաշտպանի, Սահմանադրական դատարանը հստակ չի տվել այն կարևոր հարցի պատասխանը, թե քանի անգամ կարող է վերացվել քննիչի` անձի նկատմամբ կայացրած որոշումը: Այսինքն` անորոշ է մնացել, թե արդյոք Գլխավոր դատախազի կողմից քննիչի որոշումը վերացնելու դեպքում քննիչի կայացրած նոր որոշումը կրկին կարո՞ղ է վերացվել, թե՞ ոչ:
Կարեն Անդրեասյանի գնահատմամբ, այս դատական վեճի դրական արդյունք է այն, որ Սահմանադրական դատարանը սահմանել է, որ որոշումների կայացումն անհարկի ձգձգելը բացառելու համար հետաքննության մարմինն ու քննիչը պետք է անհապաղ տրամադրեն անհրաժեշտ նյութերն ու փաստաթղթերը:
Սա կնպաստի մարդու վերաբերյալ որոշումների կայացման` օրենքով սահմանված ժամկետների պահպանմանը: Միևնույն ժամանակ հաշվի չեն առնվել այն դեպքերը, երբ նյութերի անհապաղ տրամադրումն օբյեկտիվ պատճառներով անհնար կլինի: Այս խնդիրն այժմ արդեն հնարավոր կլինի լուծել միայն համապատասխան օրենսդրական փոփոխությամբ:
«Ամփոփելով Դատարանի կայացրած որոշումը` կարող ենք փաստել, որ Օմբուդսմենի միջամտությամբ և Սահմանադրական դատարանի որոշմամբ ամրագրվեցին մարդու համար կարևոր մի շարք երաշխիքներ, սակայն, այնուամենայնիվ, շարունակվում է չլուծված մնալ անձի` անորոշ ժամկետով քրեական հետապնդման մեջ մնալու խնդրահարույց հարցը: Այս պարագայում հարցին ևս կարող է օրենսդրական լուծում տրվել, ինչի վերաբերյալ Օմբուդսմենն Ազգային ժողովի խմբակցություններին կներկայացնի կոնկրետ առաջարկներ»,- նշում է Մարդու իրավունքների պաշտպանը:
Կարեն Անդրեասյանը հիշեցնում է, որ ինքը դեռեւս 2013թ. բարձրացրել էր նշված խնդիրը, իսկ արդեն 2015թ. նա Սահմանադրական դատարանում վիճարկեց Քրեական դատավարության օրենսգրքի համապատասխան դրույթը՝ Քննչական կոմիտեից ստացված դիմումի հիման վրա: Օմբուդսմենի՝ Սահմանադրական դատարան դիմելուց որոշ ժամանակ անց Գլխավոր դատախազը նույնպես դիմեց Սահմանադրական դատարան, և նրա դիմումը միացրեցին Օմբուդսմենի դիմումին: