«Եթե Հայաստանում ինչ որ միտինգային, փողոցային պայքարի հարցեր է գնում, ապա էդ ամեն ինչից անմիջապես առաջ ինչ որ մարդիկ են ձերբակալվում, ու դրանց թվում պարտադիր ազատամարտիկներ են լինում։ Սա կարծես թե օրինաչափություն է դառնում»,-«Առաջին լրատվական»-ի հետ զրույցում ասաց ազատամարտիկ Վլադիմիր Առաքելյանը՝ հավելելով, որ ինքը բացառում է և չի հավատում, որ Խաչիկ Ավետիսյանը կարող էր որևէ մասնակցություն ունենալ նախօրեին Նորք Մարաշում վնասազերծված զինված խմբի հետ։
Վլադիմիր Առաքելյանն ասաց, որ վերջին երկու ամսում Խաչիկ Ավետիսյանը գրեթե ամեն օր իրենց տանն է եղել և ինքը ոչ մի կասկածելի բան չի նկատել։ «Ինքը վերջին շրջանում առողջական խնդիրներ ուներ, ամեն օր մեր տանն է եղել, գալիս էր, նստում էինք, խոսում էինք ու ընդհանրապես ոչ մի տարօրինակ բան չէի նկատել, ոչ մի բառ ինքը չի խոսել, չի ասել, որ էդպիսի խումբ կա, տենց ջահելներ կան»,- հավելեց Առաքելյանը։
Մեր զրուցակիցը նշեց, որ իրենք հետևելու են այս գործընթացին և իրենց։ «Իրենք կարող էին այս ամենը շուտ անել, եթե հետևել էին, գաղտնալսել և այլն։ Բայց ինչի հենց ամսի 1-ի միտինգից առաջ։ Այս ամեն ինչը փաստում է, որ փորձ է արվում վախի մթնոլորտ տարածել ժողովրդի մեջ։ Երրորդ համաշխարհային պատերազմն է սկսում, Սիրիայում պատերազմ է, իսկ մենք ընկել ենք չգիտեմ ինչերի հետևից, ազատամարտիկներին ենք մեկուսացնում։ Որ էդպես լինի, Հայաստանի ժողովրդի 90 տոկոսը դեմ է էս իշխանություններին, դե թող դնեն ու բոլորին բռնեն»,- նկատեց մեր զրուցակիցը։
Ազատամարտիկ Ռազմիկ Պետրոսյանն էլ խուսափեց կարծիք հայտնելուց՝ համարելով, որ ինֆորմացիան քիչ է, Ավետիսյանի ձերբակալության մասին էլ նոր է իմացել, սակայն նկատեց, որ եթե գործում կան ազատամարտիկներ, ապա ինքը հակված է կարծելու, որ պետությանը որևէ վտանգ չէր կարող սպառնալ և Սահմանադրության որևէ նորմ չէր խախտվելու։ «Բայց, եթե այնտեղ զենքեր են եղել, ապա դա ինքնին հանցագործության մասին է խոսում։ Չնայած, կարծում եմ նաև, որ հնարավոր է իրենք չիմանալով են ներգրավվել այս գործընթացում, բայց էլի պնդում եմ, որ իրենք ոչ մի վտանգավոր բանի չէին գնա մի երկրի, մի պետության համար, որի համար կյանք են դրել, դրա համար էլ հակված եմ մտածելու, որ այս ամենը սարքած է»,- ասաց Պետրոսյանը՝ հավելելով, որ մեզ երկրորդ հոկտեմբերի 27 պետք չէր։
Հիշեցնենք, որ Նորք Մարաշում, նախօրեին ԱԱԾ-ի կողմից վնասազերծված հանցավոր խմբի մեկուսացումից հետո ձերբակալվել է նաև ազատամարտիկ Խաչիկ Ավետիսյանը։ Այսօր, բացի Նորքի առանձնատնից ձերբակալված 9 հոգուց, դատարանը կալանքի սանկցիաներ կկիրառի ևս 12 հոգու նկատմամբ, քանի որ դեպքից հետո ձերբակալվածների թիվը կազմում էր 21։