Թուրքական T24 առցանց թերթի փոխանցմամբ՝ լրագրող Ջենգիզ Չանդարի դեմ երկու առանձին գործով տարվում է հետաքննություն, որոնք կապված են Radikal թերթում նրա 7 հրապարակումների հետ։
Դա մասնավորապես վերաբերում է հուլիսի 26-ին նրա հրապարակած հոդվածին, որը վերնագրված էր որպես «Արդարացում. ահաբեկչության դեմ պայքար. նպատակը հունիսի 7-ի ռևանշը»։ Չանդարի մնացյալ 6 հոդվածներն էլ հրապարակվել են 2015 թվականի հուլիսի 26-ից օգոստոսի 19-ը։
Թուրքիայի նախագահ Ռեջեփ Էրդողանի փաստաբան Ահմեդ Օզելը հայտարարել է, որ Չանդարը մեղադրվում է Թուրքիայի քրեական օրենսգրքի 299-րդ հոդվածը (մամուլի միջոցով նախագահին վիրավորել) խախտելու համար։ Չանդարին արդեն իսկ սկսել են հարցաքննել այդ գործերով։
Չանդարը հայտարարել է, որ ինքը 40 տարվա լրագրող է և իր լրագրողական գործունեության ժամանակ տեսել է 7 նախագահի, անգամ եղել է նրանցից մեկի խորհրդականը (նկատի ունի Թուրքիայի 8-րդ նախագահ Թուրգութ Օզալին, որը Թուրքիայի նախագահ է հանդիսացել 1989-1993 թվականներին)։
Չանդարը հիշեցրել է, որ շատ «ծանր» հոդվածներ է գրել Քենան Էվրենի (Թուրքիայի 7-րդ նախագահ, 1982-1989թթ.) ու Սուլեյման Դեմիրելի (Թուրքիայի 9-րդ նախագահ, 1993-2000թթ) մասին, սակայն նրանք հայց չեն ներկայացրել իր դեմ։