Թուրքերի կողմից կործանված ռուսական Սու-24 ռազմական օդանավն իրավունք չուներ այդքան մոտենալ Թուրքիայի սահմանին, բայց մյուս կողմից՝ Թուրքիան իր հերթին պետք է ավելի զուսպ պատասխան տար:
Ամերիկացի դիվանագետ, գրող և վերլուծաբան Ռիչարդ Կաուզլարիչն այսպես մեկնաբանեց նոյեմբերի 24-ին թուրք-սիրիական սահմանին տեղի ունեցածը՝ պատասխանելով «Առաջին լրատվական»-ի մի քանի հարցերին:
«Ռուսական ինքնաթիռի խոցումը հետևանքն էր ռուսական օդուժի անխոհեմ վարքագծի, որին նա դիմում էր ՆԱՏՕ-ի բազմաթիվ երկրների սահմանին: Դա չպետք է տեղի ունենար: Ռուսական օդանավն իրավունք չուներ այդքան մոտենալ Թուրքիայի սահմանին: Միաժամանակ, Թուրքիան պետք է ավելի զուսպ պատասխան տար: Կարծում եմ՝ երկու երկրներն էլ կփորձեն խնդիրը լուծել դիվանագիտական ճանապարհով»,- ասաց Միացյալ Նահանգների պետքարտուղարի նախկին օգնականը:
Մեր զրուցակիցն անդրադարձավ նաև Թուրքիայի արտգործնախարար Մևլութ Չավուշօղլուի Բաքու կատարած այցին, և այս համատեքստում ռուսական «Կոմերսանտ» թերթի հայտնած տեսակետին, որ Թուրքիան կարող է նոր ճակատ բացել Ռուսաստանի դեմ Լեռնային Ղարաբաղում՝ ադրբեջանցիներին հրահրելով նոր սադրանքների հայ-ադրբեջանական սահմանին:
Ադրբեջանի և Հայաստանի հակամարտությունը, ըստ Կաուզլարիչի, չի ծառայում Թուրքիայի շահերին՝ հատկապես հիմա. «Շփման գծում արդեն իսկ եղել են բավականին շատ միջադեպեր, և ես համոզված չեմ, որ Թուրքիայի նոր արտգործնախարարի այցը Բաքու կապված էր Լեռնային Ղարաբաղի հետ»:
Մյուս կողմից էլ, ռուսներն այս իրադարձությունների համապատկերում կրկին սկսել են օգտագործել հայկական գործոնը Թուրքիայի դեմ. Ռուսաստանի Պետդումայի մի խումբ պատգամավորներ առաջարկել են քրեականացնել Հայոց ցեղասպանության ժխտումը ՌԴ տարածքում, շատ քաղաքական գործիչներ նաև առաջարկում են, օրինակ՝ հայերին վերադարձնել իրենց պատմական հողերը:
Այս տեսանկյունից դիվանագիտական ինչպիսի՞ պատասխան կարող է տալ Թուրքիան: Օրինակ՝ Թուրքիան այս իրավիճակում կարո՞ղ է վերսկսել Հայաստանի հետ հարաբերությունների կարգավորման գործընթացը:
Պատասխանելով մեր այս հարցադրմանը՝ Կաուզլարիչն ասաց. «Ե՛վ Թուրքիան, և՛ Ռուսաստանը դիվանագիտական քայլեր կձեռնարկեն ինքնաթիռի կործանումից հետո, բայց դրանցից ոչ բոլորը դրական կլինեն: Այն, ինչ ասում եք, միանգամայն կարող է տեղի ունենալ, բայց ես չեմ տիրապետում Հայաստանի գործոնին առնչվող մանրամասներին»:
