ԵՄ արտաքին քաղաքականության հարցերով բարձրագույն ներկայացուցիչ Քեթրին Էշտոնը հանդես է եկել Ադրբեջանում նոյեմբերի 7-ին կայացած խորհրդարանական ընտրությունները գնահատող հայտարարությամբ:
ԵՄ խորհրդի պաշտոնական կայքէջում զետեղված հայտարարության համաձայն` խորհրդարանական ընտրություններն Ադրբեջանում, չնայած այն հանգամանքին, որ անցել են խաղաղ մթնոլորտում ու ընդդիմադիր ուժերի մասնակցությամբ, «նշանակալի առաջընթաց չեն արձանագրել»:
Էշտոնը, համակարծիք լինելով ընտրությունների վերաբերյալ ԵԱՀԿ դիտորդական առաքելության նախնական գնահատականին, կոչ է անում Ադրբեջանի իշխանություններին վերացնել ընտրական գործընթացում տեղ գտած բոլոր անճշտություններն ու թերությունները: «Ես նաև կոչ եմ անում Ադրբեջանին ավելացնել ջանքերն իր ստանձնած միջազգային պարտավորությունների կատարման ուղղությամբ, մասնավորապես` ժողովրդավարական սկզբունքներին ու մարդու իրավունքներին առնչվող հարցերում` ապահովելով ու ամրապնդելով ժողովրդավարական բազմակարծությունը, մամուլի ազատությունն ու հանրահավաքների ազատ կազմակերպման հնարավորությունը», – ասված է հրապարակված հայտարարությունում: