Թուրքական Son dakika լրատվական կայքի փոխանցմամբ՝ Թուրքիան ռուսական, ինչպես նաև իրանական գազից իր կախվածությունը թուլացնելու համար պատրաստվում է բնական գազ ներկրել Հյուսիային Իրաքի քրդական ինքնավարությունից (ՀԻՔԻ)։
Փորձագետներն արդեն սկսել են մտածել ներկայիս պայմաններում հետագա անելիքների մասին, երբ հայտնի չէ, թե արդյոք Ռուսաստանը կկասեցնի՞ գազի մատակարարումները Թուրքիային, թե՞ ոչ։ Այդ պլանում նրանց տեսադաշտում է հայտնվել ՀԻՔԻ-ն։ Հաղորդվում է, որ ՀԻՔԻ-ի խորհրդարանի էներգետիկ հանձնաժողովի անդամ Բեյար Դոսկին հայտարարել է, որ իրենք պատրաստվում են Քրդստանի բնական գազն արտահանել համաշխարհային շուկաներ, որով և Քրդստանը կհայտնվի աշխարհի էներգետիկ քարտեզի վրա։ Նրա խոսքերով՝ ՀԻՔԻ-ն հարուստ է ոչ միայն նավթային, այլև գազային պաշարներով, և եթե Թուրքիան ցանկանում է բնական գազ ներկրել իրենցից, ապա պետք է դրա համար ստեղծի համապատասխան ենթակառուցվածք։
Հիշեցնենք, որ ներկայումս ՀԻՔԻ-ի տարածքով դեպի Թուրքիա է ձգվում «Քիրքուք-Յումուրթալըք» (Ջեյհան) նավթամուղը, որն իր թողունակության ցուցանիշով (70.9 միլիոն տոննա նավթ) գերազանցում է «Բաքու-Թբիլիսի-Ջեյհան» (ԲԹՋ) նավթամուղին (50 մլն տոննա նավթ): Չնայած դրան՝ 2014 թվականին Քիրքուք-Յումուրթալըք նավթամուղով փոխադրվել է շատ քիչ ծավալի նավթ, ինչի գլխավոր պատճառներից մեկն այն է, որ «Քրդստանի աշխատավորական» կուսակցության (PKK) զինյալները վերջին տարիներին մի քանի տասնյակ անգամ պայթեցրել են այդ խողովակաշարը։