Թուրքական Sabah թերթի փոխանցմամբ՝ Թուրքիայի նախագահ Ռեջեփ Էրդողանը հայտարարել է, որ Թուրքիայի ռազմաօդային ուժերը կանխամտածված ձևով չեն կործանել Ռուսաստանի «Սու-24» ռմբակոծիչը, և որ Ռուսաստանի հետ հարաբերությունները շատ կարևոր են Թուրքիայի համար։
Էրդողանի խոսքով՝ երեքշաբթի առավոտյան Հաթայ նահանգի հարավում իրենց օդային սահմանը հատել են 2 ինքնաթիռ, որոնցից մեկին կործանել են իրենց F-16 կործանիչները. «Չնայած 5 րոպեում մեր 10 զգուշացումներին՝ նա չփոխեց ուղղությունը և մտավ մեր սահման։ Այդ ժամանակ մենք չգիտեինք, թե ում է պատկանում ինքնաթիռը։ Ռուսական ռազմական ինքնաթիռներն ավելի վաղ նույնպես խախտել են մեր օդային տարածքը։
Դեպքերից մեկը 15 րոպեի չափ իրականացվել է Սև ծովում։ Ինչ վերաբերում է Սիրիայի հետ սահմանին, ապա սա արդեն մեր օդային տարածքի խախտման երրորդ դեպքն է։ Առաջին երկու դեպքերը գրանցվել են հոկտեմբերի 3-4-ին։ Այս ազգը ոչ մեկի թիկունքից չի հարվածել»։
Ավելի վաղ Ռուսաստանի նախագահ Վլադիմիր Պուտինը Թուրքիայի կողմից ռուսական ինքնաթիռի խոցումը որակել էր որպես թիկունքից հասցված հարված։