Թուրքական Son dakika լրատվական կայքի փոխանցմամբ՝ Թուրքիայում ԱՄՆ դեսպանատունն արձագանքել է ընդդիմադիր Cumhuriyet թերթի գլխավոր խմբագիր Ջան Դյունդարի ու Անկարայում թերթի ներկայացուցիչ Էրդեմ Գյուլի կալանավորմանը։
ԱՄՆ դեսպանատունը Twitteri-ի իր միկրոբլոգում տարածած հայտարարության մեջ նշել է, որ իրենք խորապես մտահոգված են Դյունդարի ու Գյուլի կալանավորման, ինչպես նաև մամուլի վրա ուժգնացող ճնշումների կապակցությամբ։
ԱՄՆ դեսպանատունը հույս է հայտնել, որ թուրքական դատարաններն ու իշխանությունները Սահմանադրության շրջանակներում կերաշխավորեն մամուլի ազատության սկզբունքը։
Դյունդարին ու Գյուլին մեղադրում են ահաբեկչական խմբավորման անդամ լինելու, քաղաքական ու ռազմական լրտեսության ու գաղտնի փաստաթղթեր հրապարակելու մեջ, որով լրագրողները կարող են դատապարտվել տևական ժամկետներով ազատազրկման։
Ընթացիկ տարվա հունիսին Cumhuriyet թերթն իր առաջին էջում լուսանկարներ էր հրապարակել, որոնցում պատկերված էին Սիրիա զենք փոխադրող թուրքական Ազգային հետախուզական կազմակերպության (MIT) բեռնատարները։ Հոդվածում նշված էր, որ բեռնատարներում եղել է մոտ 1000 արկ, 1000 ականանետ, 50.000 գնդացրի փամփուշտ և 30.000 միավոր զինամթերք՝ նախատեսված մեծ տրամաչափի զենքերի համար։