«Այս ամենը կարելի էր վերագրել իշխանութան կատարած հերթական անհեթեթ քայլերի շարքին, եթե չլիներ լարված իրավիճակ և՛ Հայստանում, և՛ տարածաշրջանում, և կատարվածը էապես կապված չլիներ հայաստանյան ու տարածաշրջանային զարգացումների հետ: Առաջինը, ինչ պետք է հասկանար մեր ժողովուրդը, այն է, որ այդ բոլոր տարերային աղետների շարքին, որոնցից առաջինը իշխանությունն է, ավելացել է ևս մեկը՝ հանրապետությունում ահաբեկիչներ են հայտնվել: Մինչդեռ ոչ մի այդպիսի բան գոյություն չունի: Գոյություն չունի այն իմաստով, որ ժողովրդին ոչ մի բան չէր սպառնում, չկա այդպիսի խնդիր և պետք չէր մարդկանց ահաբեկել»,- «Առաջին լրատվական»-ի հետ զրույցում նշեց «Հայաստան» նախաձեռնության անդամ Աշոտ Մանուչարյանը՝ անդրադառնալով այն հայտարարությանը, որ Նորք-Մարաշում ԱԱԾ-ի կողմից վնասազերծվել է հանցավոր խումբ:
Աշոտ Մանուչարյանի դիտարկմամբ՝ արտասանվեց բանալի բառ՝ սիրիահայ. «Սա ուղղակի խայտառակություն է, որովհետև մարդկանց մեջ տպավորվում է, որ Սիրիայից վտանգ է սպառնում, այն էլ սիրիահայերի միջոցով: Սա արվում է այն իրավիճակում, երբ որ մեր ողջ ժողովուրդը համախմբված պետք է պաշտպան կանգնի սիրիահայությանը, որի բավականին համարձակ զավակները հայտնվել են այստեղ, և դեռ մեզ անհայտ է, թե ինչ գործունեության համար, բայց հաստատ ոչ ժողովրդի դեմ գործողությունների համար»:
Մեր զրուցակիցը տեղեկացրեց, որ ճանաչում է այդ խմբի հետ կալանավորված անձանցից մեկին՝ փոխգնդապետ Խաչիկ Ավետիսյանին. «Նրան կարծես ամեն մի բուռն իրադարձությունից առաջ ձերբակալում են, առաջին անգամ ձերբակալել են Մարտի 1-ի իրադարձություններից առաջ, որովհետև երբ որ հրաման էին տվել, որ տագնապ բարձրացնել և իր կողմից ղեկավարվող զորամիավորումը մտցնել Երևան, նա զինվորներին շարել էր և ասել, որ ժողովրդի դեմ զենք չուղղեն»:
Աշոտ Մանուչարյանի կարծիքով՝ սա իշխանության սադրանքն է. «Եթե ի սկզբանե տեղյակ ես եղել, որ այսպիսի բան է եղել հանրապետությունում, ինչո՞ւ չես կանգնեցրել»:
Մանրամասներ՝ տեսանյութում: