Ադրբեջանական APA լրատվական գործակալության փոխանցմամբ` Ադրբեջանի նախագահ Իլհամ Ալիևն ընդունել է Թուրքիայի արտգործնախարար Մևլյութ Չավուշօղլուի գլխավորած պատվիրակությանը։
Հանդիպման ժամանակ Ալիևը հայտարարել է. «Անթալիայում G20-ի գագաթնաժողովի անցկացումը Թուրքիայի մեծ հաջողությունն է։ Շատ ուրախ եմ, որ եղբայրական երկիրն այդ գագաթնաժողովին հրավիրել է Ադրբեջանին։
Դա ևս մեկ անգամ ի ցույց է դնում թուրք-ադրբեջանական հարաբերությունների բարձր մակարդակը և համայն աշխարհին ցույց է տալիս, որ Ադրբեջանն ու Թուրքիան ամենամոտ երկրներն են իրենց համար։ Մեր երկրները հաջողությամբ համագործակցում են բոլոր ոլոտներում»։
Անդրադառնալով ռուս-թուրքական հարաբերությունների լարվածությանը՝ Իլհամ Ալիևն ափսոսանք ու մտահոգություն է հայտնել այդ կապակցությամբ: «Ադրբեջանը պատմականորեն սերտ կապեր ունի երկու երկրների հետ և պատրաստ է ջանքեր գործադրել Թուրքիայի ու Ռուսաստանի հարաբերություններում առկա լարվածության նվազեցման ու վերացման ուղղությամբ»,- ասել է նա։
Հանդիպման ժամանակ քննարկվել են նաև Ղարաբաղյան հակամարտության կարգավորումը, TANAP, TAP գազատարների, «Բաքու-Թբիլիսի-Կարս» երկաթուղու նախագծերի հարցերը։