Երեկ գրեթե չորս տարվա ընդմիջումից հետո Թեքեյան մշակութային միությունում տեղի ունեցավ Հայաստանի մտավորականների ֆորումի հերթական նիստը: Նիստին ներկա մտավորականների անունից ընդունվեց կոչ՝ ուղղված Հայաստանի իշխանություններին և ընդդիմությանը: Կոչի հիմնական ասելիքը սահմանադրական փոփոխությունների հանրաքվեի չեղարկումն էր:
Հայաստանի մտավորականների ֆորումը սահմանադրական փոփոխությունների գործընթացին ներգրավված բոլոր կողմերին առաջարկում է սթափ գնահատել աշխարհում, տարածաշրջանում և հատկապես մեր երկրում ժամ առ ժամ փոփոխվող ծայրագույն լարված իրավիճակը և գործադրել բոլոր անհրաժեշտ քայլերը հանրաքվեի անցկացման որոշումը չեղարկելու համար: «Մասնատումը այլընտրանք չէ»,- ասված է մտավորականների ֆորումի ընդունած կոչի մեջ:
Մտավորականների ֆորումը նպատակ ունի հանդիպում կազմակերպել նախագահ Սերժ Սարգսյանի հետ, և նրան ևս փոխանցել իրենց ընդունած կոչում առկա մտահոգությունները և նրան ևս համոզել, որ գնա հանրաքվեի անցկացման որոշման չեղարկմանը: Մտավորականները լիահույս են, որ նախագահը կընդունի և կլսի իրենց:
Մտավորականների ֆորումը ստեղծվեց 2003թ. նախագահական ընտրություններից հետո, երբ իշխանության և ընդդիմության միջև հակամարտությունը բավական սրված էր, և մտավորականները կարծում էին, որ իրենց կհաջողվի միջնորդ հանդիսանալ հակամարտող կողմերի միջև, հանդես գալ որպես չեզոք կողմ և թուլացնել առճակատումը: Այն ժամանակ մտավորականների ֆորումին դա չհաջողվեց, որովհետև չնայած բոլոր կոչերին և փորձերին իշխանության և ընդդիմության հակադրությունը բերեց ընդհարման և 2004թ. ապրիլի 12-ի լույս 13-ի գիշերը իշխանությունը աննախադեպ ուժ կիրառեց խաղաղ ցուցարարների նկատմամբ:
Հետագայում ևս մտավորականների ֆորումը փորձում էր հանդես գալ որպես մի ապաքաղաքական կառույց, որը պետք է հանդես գա որպես ազգային շահերի պաշտպան, մի կառույց, որն իր վրա է վերցնում հանրային բարոյականության պաշտպանության, արդարության և իմաստնության ցուցիչի դերը, սակայն որքան էլ ցավալի է արձանագրել, այս կառույցը այդպես էլ չկարողացավ լուծել իր առջև դրված խնդիրները:
Հիմա մի քանի բացառությունները չհաշված, Հայաստանում չեն մնացել հանրային մեծ ճանաչում ունեցող մտավորականներ, որոնց խոսքը կարող է ազդեցիկ լինել հանրային բոլոր շերտերի համար: Դժվար է ասել թե ինչու, բայց մտավորական բառը ավելի շատ համարվում է խորհրդային ժամանակաշրջանի հետ ասոցացվող երևույթ, որովհետև չի կարելի ասել որևէ համազգային ճանաչում ունեցող գրողի, դերասանի, գիտնականի անուն, ով համազգային ճանաչման է հասել անկախացած Հայաստանում: Մտավորականների ֆորումի նախագահությունում նստած Երվանդ Մանարյանը արդեն 90-ն անց է: Սիլվա Կապուտիկյանի, Հրանտ Մաթևոսյանի, Օհան Դուրյանի, Սոս Սարգսյանի, Տիգրան Լևոնյանի կարգի հեղինակություններ այլևս չկան, և դժվար է ասել, որ առաջիկայում կլինեն, որովհետև նման հեղինակությունները մեկ օրում չեն ծնվում կամ համազգային հեղինակություն վայելում:
Մտավորականների ֆորումի երեկվա նիստում հնչող ելույթների կոնտեքստը ևս միասնական չէր, և դժվար էր հասկանալ, թե իրականում ինչ է ուզում հայ մտավորականությունը: Սփյուռքից ժամանած Գառնիկ Սարգսյանը համարում է, որ սահմանադրական փոփոխությունները ահաբեկչության դրսևորում են, քանի որ դրանք ոտնձգություն են մեր ազգային, ընտանեկան և մարդկային արժեքների նկատմամբ, և կողմնակից է իրենց կոչում ընդունված առաջարկին, իսկ Երվանդ Մանարյանը իր ամբողջ ելույթը կառուցել էր Հայաստանի երկրորդ կեսի մասին չմոռանալու գաղափարի վրա: Նա անընդհատ կրկնում էր, որ այդ երկրոդ կեսը Աստված մեզ է տվել և եթե մենք այն չմիավորենք մեր ունեցած այս կեսին, ապա Աստված մեզ կպատժի: «Մյուս մասի մասին չպետք է մոռանանք երբեք»,- կոչ է անում Երվանդ Մանարյանը: Ի վերջո, ո՞րն է նպատակը՝ այս ունեցած կեսում ավելի լավ երկիր կառուցե՞լը, թե՞ այն երկրորդ կեսը եղածին միացնելը:
Լուսանկարը` Առավոտ-ի