ԱՄՆ նախագահի թեկնածու Դոնալդ Թրամփին քննադատել են այն բանի համար, որ նոյեմբերի 25-ին Հարավային Կարոլինայում իր կողմնակիցների առջև ելույթի ժամանակ նա արել է ֆիզիկական պակասություն ունեցող լրագրողի պարոդիան: Politico պարբերականը հայտնել է, որ նրա կատակի առարկան դարձել է The New York Times-ի աշխատակից Սերժ Կովալևսկին:
Նոյեմբերի 22-ին Թրամփը հայտնել է «արաբական բնակչությամբ թաղամասերի հազարավոր բնակիչների» մասին, ովքեր ուրախացել են Նյու Յորքի առևտրային կենտրոնի երկնաքերների կործանման համար: 2001 թվականի սեպտեմբերի 11-ից հետո Կովալևսկին գրել է. «Ոստիկանները կալանավորել և հարցաքննել են մարդկանց, որոնք ենթադրվում է ուրախացել են, և երեկույթներ են անցկացրել գետի մյուս ափին շենքերի խորտակման կապակցությամբ»:
Իմանալով այն մասին, որ Թրամփը փոխել է իր տողերը և օգտագործել իր ելույթում, Կովալևսկին նշել է, որ մանրամասն չի հիշում, սակայն, հարյուրավոր և հազարավոր ուրախացողների մասին ոչ ոք չի խոսել:
Նոյեմբերի 25-ին Թրամփը արձագանքել է Կովալևսկու այդ մեկնաբանությանը և նմանակել է նրան` թափահարելով ձեռքերը և նմանակելով արտրոգրիպոզի նշանները, ինչով տառապում է լրագրողը: «Է-է-է, դե, ես չգիտեմ, ինչ եմ ես ասել: Ես չեմ հիշում: Չեմ հիշում: Կարող է, հենց դա էլ ասել եմ»:
«Մենք վրդովեցուցիչ ենք համարում, որ նա քննադատում է մեր լրագրողներից մեկի արտաքինը»,- հայտարարել է The New York Times-ի ներկայացուցիչը Politico-ին:
