«Մենք անում ենք ամեն ինչ՝ ժողովրդին գիտակցված գործողությունների տանելու համար՝ լինի դա սահմանադրական փոփոխություններին «ոչ» ասելը, թե չմասնակցելը այս հանրաքվեին: Իմ դիտարկումներով՝ Հայաստանի հյուսիսում ուրվականների գյուղեր են՝ մարդաթափված»,- «Առաջին լրատվական»-ի հետ զրույցում ասաց «Հայք» նախաձեռնության անդամ, դասախոս Վարդան Խաչատրյանը՝ հավելելով, որ իշխանությունների նկատմամբ մարդկանց հավատի բացակայությունը շատ վտանգավոր է ստեղծված իրավիճակում:
Վարդան Խաչատրյանի խոսքով՝ Սահմանադրության այս հանրաքվեով հայ ժողովուրդը կարող է ևս մեկ հիասթափություն ապրել, ինչը կարող է հանգեցնել արտագաղթի նոր ալիքի. դա անթույլատրելի է. «Մտավորականությունը պետք է ժողովրդին արթմնության կոչ անի, որովհետև ներքին խնդիրները գնալով խորանում են, իսկ արտաքին սպառնալիքները գլորվում են դեպի Հայաստան»:
Մեր զրուցակցի համոզմամբ՝ «ոչ»-ի բոլոր կողմնակիցները պետք է ուղիղ եթերով բանակցություններ վարեն և հանգեն անվիճելի, վերջնական, ժողովրդի համար հասկանալի որոշման:
Նա համարում է, որ առաջնայինը ամեն գնով հայ ժողովրդի միասնականության փրկությունն է. «Մեր ժողովուրդը պետք է ամեն գնով վիժեցնի այս գործընթացը, որ չբերի վերջին հաշվով նոր առճակատումների. էդ շռայլությունը այլևս Հայաստանը ի վիճակի չէ իրեն թույլ տալու»: