Այսօր երեկոյան մեկնարկելու է Հայաստան հիմնադրամի ամենամյա հեռուստամարաթոնը։
Պետք է նկատենք, որ վերջին տարիների փորձը ցույց է տալիս, որ հիմնադրամին տարեցտարի ավելի քիչ գումար է նվիրաբերվում, քան նախորդ տարիներին։ Ինչպես նաև, որ տարեցտարի կրճատվում է արևմտյան նվիրատվությունները, և հիմնադրամի հիմնական ֆոնդը ձևավորվում է ռուսական նվիրատվությունների հաշվին։
Եվ, եթե հիմա էլ նայում ենք հիմնադրամի կայքը, ապա նվիրատվությունների հիմնական խոստումները տրված են տեղացի և ռուս գործարարների կողմից։
Մասնավորապես, արդեն իսկ հայտնի է, որ «Գրանդ Հոլդինգ» ՍՊԸ-ի սեփականատերեր Կարեն և Միքայել Վարդանյանները 30-ական միլիոն ՀՀ դրամ կնվիրաբերեն Հիմնադրամին` Արցախում եկեղեցի կառուցելու նպատակով:
«Ֆլեշ» ՍՊԸ-ի նախագահ Բարսեղ Բեգլարյանը 100 հազար ԱՄՆ դոլար կնվիրաբերի Արցախում 5 և ավելի երեխաներ ունեցող ընտանիքներին տներով ապահովելու ծրագրին, որն այս տարվա հեռուստամարաթոնի գլխավոր նպատակն է:
Նույնքան գումար, նույն նպատակի համար կնվիրաբերի նաև հայաստանաբնակ գործարար Վարուժան Գրիգորյանը։
Ռուսաստանաբնակ գործարար Սամվել Կարապետյանը պատրաստակամություն է հայտնել 1 միլիոն ԱՄՆ դոլար նվիրաբերել նույն՝ Արցախում 5 և ավելի երեխաներ ունեցող ընտանիքներին տներով ապահովելու ծրագրին։
Նշենք, որ սրանք բոլորն էլ դեռևս նվիրատվության խոստումներ են և դեռ հայտնի չէ, թե մարաթոնից հետո որքանով դրանք իրականություն կդառնան։
Հիշեցնենք, որ անցած տարի՝ 2014-ին «Հայաստան» համահայկական հիմնադրամի հեռուստամարաթոնի ժամանակ արձանագրվեց 12 միլիոն 399 հազար 550 դոլարի նվիրատվություն և նվիրատվության խոստում։ Մարաթոնի արդյունքում հավաքված ամբողջ գումարը պետք է ուղվեր Հայաստանը և Ղարաբաղը կապող շուրջ 116 կիլոմետրանոց Վարդենիս-Մարտակերտ ավտոճանապարհի ասֆալտապատմանն ու հարդարմանը:
2013-ին «Հայաստան» հիմնադրամի 16-րդ հեռուստամարաթոնի ժամանակ էլ արձանագրվել էր ավելի քան 22.5 միլիոն դոլարի նվիրատվություն և նվիրատվության խոստում:
«Մեր գյուղը» խորագիրը կրող 15-րդ հեռուստամարաթոնին հավաքվել էր քիչ ավելի շատ:
«Հայաստան» համահայկական հիմնադրամի դրամահավաք 2011-ին էլ արձանագրվեց 30 միլիոն 921 հազար 478 դոլարի նվիրատվություն և նվիրատվության խոստում։
«Հեռուստամարաթոն-2010»-ի ընթացքում հանգանակվել էր մոտ 21 միլիոն դոլար։
«Հայաստան» հիմնադրամի ամենամյա հեռուստամարաթոնների ընթացքում հանգանակված գումարների մեծության առումով, առայժմ ռեկորդային է մնում «Հեռուստամարաթոն-2008»-ը, որի ժամանակ նվիրաբերվեց ավելի քան 35 միլիոն դոլար։ Այդ տարի մոսկովյան ճաշկերույթի ժամանակ միայն Սամվել Կարապետյանը հիմնադրամին նվիրաբերել էր 15 միլիոն դոլար:
Նշենք, որ ամենամյա հեռուստամարաթոնին նախորդում է տարբեր երկրների տարբեր քաղաքներում կազմակերպվող ճաշկերույթները, որոնց ժամանակ ևս կատարվում են նվիրատվություններ և նվիրատվության խոստումներ։
Այս տարվա հեռուստամարաթոնը կմեկնարկի երեկոյան, Հայաստանի ժամանակով 22:00-ին Լոս Անջելեսում և կշարունակվի մինչև վաղն առավոտյան ժամը 10։00։