Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկին Ռուսաստանի Առաջին ալիքի եթերում հայտարարել է, որ տարածաշրջանում Ռուսաստանի միակ դաշնակիցը Հայաստանն է: Նրա խոսքով՝ հայերը կարող են զենքով գնալ ուղիղ Թուրքիա և հասնել մինչև Ստամբուլ։
«…Այդ տարածաշրջանում միակ հավատարիմ դաշնակիցը, ով կկատարի ամեն ինչ, ինչ մենք ցանկանանք, Հայաստանն է։ Այ, նրանք կանեն ամեն ինչ, միայն ասեք նրանց»,- ասել է Ժիրինովսկին։
Նա կոչ է արել զենք տալ հայերին: Հարցին՝ ո՞ւր գնան հայերը զենքով, Ժիրինովսկին պատասխանել է. «Ուղիղ դեպի Թուրքիայի սահման»։
«Թուրքական սահման նրանք արդեն գնացել են և Թուրքիայի կեսը գրավել են, բոլշևիկները խանգարեցին, Լենինը զենքը տվեց Աթաթուրքին, զենքը պետք էր հայերին տալ»,- ասել է Ժիրինովսկին:
«Հայերն ամեն ինչ կանեն, միայն նրանց պետք է ասել՝ իրավո՛ւնք ունեք, մենք ձեր թիկունքին կանգնած ենք, ինչպես ԱՄՆ-ը և Իսրայելը՝ Թուրքիայի, մենք Հայաստանի թիկունքին կանգնած ենք, և Հայաստանը քրդերի հետ կհասնեն մինչև Ստամբուլ»,- ասել է նա։
Ավելի վաղ Ժիրինովսկին ասել էր, որ Թուրքիայի հարցերը պետք է ուրիշի ձեռքով լուծել: «Հայերն ատում են թուրքերին, և եթե մենք թույլ տանք ազատագրել իրենց արևմտյան տարածքները, սիրով դա կանեն: Հայերը դա արդեն արած կլինեին 1918 թվականին, բայց այն ժամանակ Ռուսաստանը չօգնեց հայերին»,- ասել է նա: