Թուրքական Cumhuriyet թերթի փոխանցմամբ՝ երեկ երեկոյան ռուսական ավիացիան հարվածել է Թուրքիայից Սիրիա մուտք գործած բեռնատարների ավտոշարասյանը, որոնք թուրքական կողմի պնդմամբ՝ տեղափոխել են մարդասիրական օգնություն (շինանյութեր)։
Հաղորդվել է, որ այդ բեռնատարները պատկանել են թուրքական Մարդու իրավունքների ու ազատությունների հիմնադրամին (İHH)։ Թուրքական բեռնատարները Քիլիսի նահանգից մուտք են գործել Սիրիա, սակայն սահմանից 4 կիլոմետր հեռավորության վրա՝ Ազեզի շրջանում, ենթարկվել են ռուսական ավիացիայի հարձակմանը։
Հարձակման ժամանակ զոհվել է 7 և վիրավորվել 10 մարդ։ Այրվել է 20 բեռնատար։ Սիրիայի կառավարությանը մոտ կանգնած աղբյուրները հայտնել են, որ իրականում բեռնատարները զենք են տեղափոխել, և որ նրանք սահմանը հատելուց հետո իրենց թուրքական համարները փոխել են սիրիական համարներով։