Հայաստանի ֆուտբոլի ֆեդերացիայի նախագահ Ռուբեն Հայրապետյանը լրագրողների հետ հանդիպմանն անդրադարձել է նաև Հայաստանի հավաքականի խնդիրներին․
«Երբեք չի եղել, որ այս կամ այն մարզչին պարտադրեմ որևէ ֆուտբոլիստի չհրավիրել հավաքական։ Ալբանիայի հետ խաղից առաջ, այո, մարզչին խորհուրդ տվեցի երկու ֆուտբոլիստի չհրավիրել։ Ֆրանսիայի խաղին Ռոբերտ Արզումանյանն ու Յուրա Մովսիսյանը խաղից 3 ժամ առաջ հրաժարվել էին հանդես գալ հավաքականում։ Ամեն ինչ նորմալ էր։ Եթե մարզիչն ինձ լսեր, չէր խաղացնի։ Միգուցե, ավելի լավ արդյունք ունենայինք։ Մարզչին ասացի՝ այս մարդիկ ուղղակի չեն ցանկանում խաղալ։ Ալբանիայի խաղից առաջ նրանց ասացի, եթե ցանկություն չունեք խաղալու, մի խաղացեք, վնասվածքը պատճառ չդարձնեք։ Ունենք 2-3 տաղանդավոր ֆուտբոլիստ, մնացածն էնտուզիազմով երկրի պատվի համար խաղացող ֆուտբոլիստներ էին։ Հիմա տեսեք՝ ինչ է կատարվում։ Ամեն խաղի որքան կիլոմետր են վազում, հիմա քայլում են։ Կառլեն Մկրտչյանը, նվիրված խաղում էր։ Պորտուգալիայի խաղին փախավ խաղից։ Վնասվածք չէր ստացել, ընկավ, ոտքը բռնեց ու փախավ։
Հավաքականում միասնություն չկա, բայց դրա մեղավորը Հայրապետյանը չէ։ Մեղավորը մեծամտությունն է խաղացողների, հայկական հիվանդությունը։ Հենց արտասահմանում պայմանագրեր կապեցին, հարստացան, մոռացան ֆուտբոլը։ Ի՞նչ կարող է անել Հայրապետյանը, երբ որոշ խաղացողներ միլիոնանոց պայմանագրեր են կնքել ու նստել պահեստայինների նստարանին՝ կարպագահության խախտման, ոչ ֆուտբոլային արարքներ անելու համար․․․ Բայց դա երբեք չի կարող վերաբերել Հենրիխ Մխիթարյանին, Գայել Անդոնյանին, Արթուր Սարկիսովին, ովքեր նվիրյալներ են։
Ի՞նչ լեզվով խոսեմ Յուրա Մովսիսյանի հետ, որ ֆուտբոլ խաղա՝ մեծ ֆուտբոլ խաղալու բոլոր հնարավորություններն ունենալով։ Չի ուզում ֆուտբոլ խաղալ։ Ցավում եմ Արազի համար, ով վնասվածքից ապաքինվելուց հետո որոշ խնդիրներ ունի մարզիչների հետ, բայց ֆուտբոլ խաղալու մեծ ցանկություն ունի, պրոֆեսիոնալ է։
Պայմանագիր են կքում, գումարներ ստանում, թանկարժեք մեքենաներ վարում ու դա համարում են իրենց կարիերայի պիկը։ Պետք է ունենանք 30 հավասարազոր ֆուտբոլիստ։ Դա է ելքը։ Պետք է հասնենք նրան, որ հավաքականում անփոխարինելի ֆուտբոլիստ չլինի։ Այլապխես այս ֆուտբոլիստներով ու այս մտածելակերպով ճանապարհ չունենք գնալու։ Ուզում եք՝ Կապելոյին բերեք։ Էդգար Մանուչարյանին համարել եմ վերջին 25 տարվա Հայաստանի ամենատաղանդավոր ֆուտբոլիստը՝ իր որակներով։ Կարգի հրավիրելու ձևերից մեկը հավաքականից հեռացնելն է։ Հիշու՞մ եք՝ ինչ արեցին երկրպագուները։ Էդգար Մանուչարյանից ես չեմ հրաժարվի, ես այնքան ներդրում ունեմ նրանում՝ սկսած երբ նա 6 տարեկան էր։
Այժմ Արգենտինայում լավ հայ ֆուտբոլիստ կա, բայց ասում է՝ հայ չեմ։ Մի քանի անգամ փորձել ենք համոզել։ Բարձրակարգ ֆուտբոլիստ է և հրավերի է սպասում Արգենտինայի հավաքականից։ Տարօրինակ ազգանուն ունի, բայց հայ է (ժպտում է)։
Պատանեկան ու երիտասարդական հավաքականներում կան լավ ֆուտբոլիստներ, բայց ֆուտբոլը 11 հոգու խաղ է։ Օրինակ Հենրիխ Մխիթարյանը միայնակ ի՞նչ անի, երբ նրա հետ չեն խաղում հավասար։ Մարզիչ չունենք, որ 13 տարիկանից բարձր ֆուտբոլիստներին զարգացնեն։ 13 ՊՐՈ լիցենզիայով մարզիչ ունենք, ու՞ր են։ Միայն երկուսն են բարձրագույն խմբում ակումբ գլխավորում՝ Աբրահամ խաշմանյանն ու Վարդան Բիչախչյանը։ 4 մարզչի ուղարկեցի Հոլանդիա, գնացին խանութից կոնֆետ գողացան։ Իսպանիայի ֆուտբոլի ֆեդերացիայի հետ էինք պայմանավորվել, ասում էին լեզու իմացող մարդ ուղարկեք։ Գոնե 20 տոկոս խոսակցական անգլերեն չգիտեն։ Հրավիրեցինք հայտնի իսպանացի մասնագետի, Իսպանիայի հավաքականի երիտասարդական հավաքականի մարզչին։ Լեկցիաներ էր կարդում այստեղ, ինչ ասում էր, ասում էին գիտենք։ Ցանկություն անգամ չունեն վերապատրաստվելու։ Մի քանի հոգի են ընդամենը, որ ցանկանում են կատարելագործվել, աշխատում են իրենց վրա, բայց տեսեք՝ քանի լիցենզիա ենք տալիս․,- նշել է Հայրապետյանը։
