Պաշտոնական այցով Հայաստան ժամանած Սերբիայի Հանրապետության պաշտպանության նախարար Բրատիսլավ Գաշիչը այսօր ռազմական համագործակցության մասին համաձայնագիր ստորագրեց Հայաստանի պատպանության նախարար Սեյրան Օհանյանի հետ, որով Հայաստանն ու Սերբիան այսուհետ գործընկերներ կդառնան նաև ռազմական ասպարեզում:
«Առաջին լրատվական»-ի հարցին, թե ինչպես է Սերբիան գնահատում Թուրքիայի կողմից ռուսական ռազմական օդանավի կործանումը, Սերբիայի պաշտպանության նախարարն ասաց. «Մեր հետախուզական ծառայությունները հետևում են իրավիճակին բոլոր ճգնաժամային շրջաններում: Սերբիան ԴԱԻՇ-ի դեմ պայքարի միջազգային կոալիցիայի մաս է: Իհարկե, մենք փոքր երկիր ենք և չենք կարող այլ միջոցներով մասնակցել այդ գործողություններին՝ բացի հետախուզության ոլորտից: Եվ մենք կարծում ենք, որ ավելի լայն կոնսենսուս, համաշխարհային կոնսենսուս է պետք միջազգային ահաբեկչության, ԴԱԻՇ-ի դեմ պայքարում: Եվ ես անկեղծորեն շատ ցավում եմ զոհված օդաչուների համար»:
Լրագրողները Սերբիայի նախարարից հետաքրքրվեցին նաև Սերբիայի տարածքում գտնվող սիրիացի փախստականների մասին: «Սերբիայի տարածքով անցած 6 ամիսներին անցել է ավելի քան 500 000 միգրանտ Սիրիայից, Իրաքից և այլ երկրներից: Եվ Սերբիայի կառավարությունը, իհարկե, մարդասիրաբար է վերաբերվել այդ մարդկանց: Եվ մեզ շնորհակալ են բոլոր միջազգային հաստատություններն ու կազմակերպությունները»,-ասաց նախարարը՝ շարունակելով. «Փախստակաների հարցերով զբաղվում են Սերբիայի Հանրապետության կառավարության 3 նախարարություններ, դրանք են՝ աշխատանքի և սոցիալական քաղաքականության, ներքին գործերի և պաշտպանության նախարարությունները: Իհարկե, այդ բոլոր նախարարությունները, որոնք ես թվարկեցի, համագործակցում են այդ առումով, և մենք ինքներս դառը փորձ ենք ունեցել. ես նկատի ունեմ մեր փախստականներին Սերբիայի Հանրապետությունից և մեր նախկին տարածքի այլ պետություններից, իհարկե, Կոսովոյի Հարավսերբական երկրամասից: Հենց այդ պատճառով մենք այդ մարդկանց այնքան մարդասիրաբար ենք վերաբերվում»:
Բրատիսլավ Գաշիչի խոսոքերով՝ Սերբիան երրորդ եվրոպական երկիրն է, որով ացնում են այդ փախստականները և միայն Սերբիայում են նրանք գրանցվել: «Եվ մենք դա արել ենք բոլոր միջազգային ակտերին, Դուբլինյան կոնվենցիային համապատասխան: Ցավոք, գոյություն չունի միջազգային բազա, որով մենք կկարողանայինք ստուգել՝ արդյոք նրանց մեջ նաև ահաբեկիչնե՞ր կան»,-ասաց սերբ նախարարը: