«Սահմանադրական փոփոխություններ. նոր հետազոտության արդյունքների ներկայացում» թեմայով հանդիպման բանախոսները ներկայացրեցին բնակչության շրջանում անցկացված հարցման արդյունքները:
APR Group ընկերության կողմից Հայաստանի ողջ տարածքով անցկացված սահմանադրական փոփոխություններին վերաբերող հետազոտությանը մասնակցած 1300 հարցվածների մոտ 50 տոկոսը բացասաբար է վերաբերվում գործընթացին:
Երկրում առկա խնդիրներից հարցման ենթարկվածների 72 տոկոսը առանձնացրել է տնտեսության զարգացման ցածր մակարդակը, 44 տոկոսը՝ արտագաղթը, իսկ 34 տոկոսը՝ թանկացումները:
Վերը նշված խնդիրները վերացնելու տարբերակը իշխանափոխությունն է՝ այսպես է պատասխանել հարցվածների մոտ 40 տոկոսը:
Երկրում առկախված խնդիրները կվերանա՞ն արդյոք՝ հարցին 38 տոկոսը բացասական պատասխան է տվել, և միայն 1.5 տոկոսն է համոզմունք հայտնել, որ սահմանադրական փոփոխությունների շնորհիվ երկրում էական փոփոխություններ կլինեն:
APR Group ՀԿ-ի փորձագետ Հերիքնազ Տիգրանյանն իր խոսքում անդրադարձավ մարդու իրավունքներին ու ազատություններին վերաբերող հարցերի արդյունքներին:
Հարցման արդյունքներով՝ հարցվածների 74 տոկոսը նշել է, որ Հայաստանում մարդու իրավունքները պաշտպանված չեն: 50 տոկոսը պատճառների շարքում նշել է, որ օրենքները կան, սակայն դրանք չեն կիրառվում:
Հետազոտության արդյունքներով՝ հարցման ենթարկվածների կեսից ավելիի՝ 56 տոկոսի կարծիքով՝ ընտրությունների արդյունքները չեն համապատասխանում իրականությանը, և միայն 5.5 տոկոսն է կարծում, որ ընտրություններն առանց կեղծիքների են անցկացվում:
Ուշագրավ է, որ եթե 1300 հարցվածների 50 տոկոսը բացասական գնահատական է տվել սահմանադրական փոփոխությունների գործընթացին և մեծ մասամբ նշել, որ չեն մասնակցելու հանրաքվեին, ապա մասնակցողների 71 տոկոսը վստահություն է հայտնել, որ հանրաքվեի արդյունքներում «այո»-ն կգերակշռի:
