Բջջային հեռախոսների շուկայի առաջատարներից մեկը` ֆիննական Nokia ընկերությունը հայտարարել է, որ կրճատում է մոտ 4 հազար աշխատակից` ընկերության ծախսերը կրճատելու համար: Բացի այդ, ևս 3 հազար աշխատակից կտեղափոխվեն Accenture ընկերություն, որտեղ կզբաղվեն Symbian օպերացիոն համակարգի մշակման աշխատանքներով, որով աշխատում են Nokia-ի սմարթֆոնները: Այս մասին հաղորդում է Reuters գործակալությունը:
Ընկերությունում կարծում են, որ այս քայլով հնարավոր կլինի տնտեսել մոտ 1.5 մլրդ դոլար: Հիմնական կրճատումները կլինեն Մեծ Բրիտանիայում, Ֆինլադիայում և Դանիայում: Այս գործողությունները շատ մասնագետներ կապում են Microsoft-ի հետ ստորագրված պայմանագրով, որով նախատեսվում է ստեղծել «iPhone-ի քիլլերին»:
Nokia-ն վերջին շրջանում կտրուկ կորցնում է դիրքերը սմարթֆոնների շուկայում, որտեղ նրա հեռախոսները չեն կարողանում մրցակցել iPhone-ի, ինչպես նաև Android օպերացիոն համակարգով աշխատող սարքերի հետ: 2007 թվից ի վեր, երբ շուկայում հայտնվեց iPhone-ը, շուկայում Nokia-ի մասնաբաժինը կրճատվել է 23%-ով, իսկ կապիտալիզացիան` 60%-ով: