CNN հեռուստաալիքը The Silk Road հաղորդման շրջանակում թողարկում է պատրաստել հայկական գորգերի մասին։ «Հայկական գորգեր. Բազմամիլիոնանոց դոլարների արդյունաբերություն» վերտառությամբ թողարկումը սկսվում է Երևանի կենտրոնում ամեն հանգստյան օրերին բացվող բացօթյա տոնավաճառից, որտեղ ցուցադրված են բազմագույն, ձեռագործ աշխատանքներ։
Հեռուստաալիքն առաջարկում է էքսկուրս՝ ուսումնասիրելու գորգագործության հարուստ ավանդույթն ու տեսնելու, թե ինչպես է բազմադարյա արհեստը վերածվել բազմամիլիոնանոց դոլարների արդյունաբերության։
Հաղորդման հեղինակները նշում են, որ ձեռագործ գորգերը բարձր են գնահատվում իրենց պայծառ գույների, որակի ու եզակի դիզայնի շնոհիվ։
Լրագրողը հանդիպել է հնագույն կարպետների խանութի սեփականատեր Արամի հետ, ով նրան ցուցադրել է հազարավոր դոլարներ արժեցող հնագույն նմուշներ։
Հաղորդման ժամանակ անդրադարձ է կատարվում նաև «Մեգերյան կարպետ» ընկերության գործունեության պատմությանը, որը սկիզբ է առել 1917 թվականին՝ Նյու Յորքում։
Ընկերության արտադրական գծով տնօրեն Լեոնիդ Անդրեասյանի խոսքով՝ գորգագործությունը հայկական մշակույթի և հայ ժողովրդի պատմության մասն է։ Գորգագործությունը սկսվում է հայկական բրդի մշակումից։ Գործարանում արված նկարահանումները ցույց են տալիս գորգագործության ողջ գործընթացը՝ թելի ստացումից մինչև վերջնական արտադրանք։ Մեկ կարպետ գործելն ամիսներ է տևում։ Շատերի համար կարպետ գործելն ավելին է, քան պարզապես աշխատանքը։
Վերջին 5 տարիներին ընկերությունը ստիպած է եղել հրաժարվել ավելի քան 1000 գորգագործներից՝ պահանջարկի անկման պատճառով։ Վաճառքի անկումը Լեոնիդը պայմանավորում է 2009-ի գլոբալ ֆինանսատնտեսական ճգնաժամով։
«Ձեռագործ գորգագործությունը շատ բարդ բիզնես է։ Ճգնաժամին մարդիկ գրեթե ամեն ինչ կգնեն, նույնիսկ ավտոմեքենա, իսկ գորգը վերջին բանն է, որ մարդիկ կգնեն նման պայմաններում»,- ասել է Լեոնիդ Անդրեասյանը։ Արևելյան գորգագործությունը Կովկասից Իրան՝ բազմամիլիոն արդյունաբերություն է։ Մեկ քառակուսի մետրը կարող է արժենալ ավելի քան 600 դոլար։
«Թուֆենկյան կարպետները»՝ ևս մեկ առաջատար տեղական բրենդ այդ ոլորտում, նվազեցրել է արտադրական ծավալը։ Մինչ ճգնաժամը ամսական արտադրվում է 1000 քառակուսի մետր կարպետ, այժմ ծավալը նվազել է 90 տոկոսով։ Գործադիր մենեջեր Արման Գրիգորյանը պատմել է, որ շարունակ մտածում է վաճառքի խթանման մասին, քանի որ առանց վաճառքի բիզնես չի լինում։
Գորգերի արտադրությունը մեքենայով արտադրանքի ստացումը դարձնում է արագ, իսկ արժեքը՝ բավականին էժան։ Լեոնիդը նշում է, որ ձեռագործ կարպետներն ինքնին ներդրում են։ Դրանց արժեքը գնման պահից բարձրանում է, իսկ մեքենայով գործված գորգերինը՝ իջնում։ «Մեգերյան կարպետներ» ընկերությունը ծրագրում է հաջորդ տարի երկու նոր արտադրական կենտրոն բացել։