Այսօր «ՀՀ քաղաքացիական օրենսգրքում լրացումներ և փոփոխություններ կատարելու մասին» և կից ներկայացված օրենքի նախագծերի փաթեթն առաջին ընթերցմամբ ընդունելու մասին հարցի քննարկման ժամանակ ԱԺ արտահերթ նիստում ԱԺ ՕԵԿ խմբակցության ղեկավար Հեղինե Բիշարյանը նշեց, որ բանկերի գործունեությունը, բանկերի և վարկառուների միջև հարաբերությունները կարծես դարձել են մեր ազգի գարշապարը, որովհետև մեր երկրներում մեր քաղաքացիները շատ են ծանրաբեռնված վարկերի պատճառով. «Այս պարագայում մեզ համար մտահոգիչ է, թե ինչպիսի հարաբերություններ պետք է լինեն, պետք է կարողանանք բանկերի հետ կապված այդ հարաբերություններն այնքան պարզեցնել և կարգավորել, որ կարողանանք օգնել մեր քաղաքացիներին»:
Բիշարյանի խոսքերով, շատ երկրներում մարդիկ վարկ են վերցնում ավելի շքեղ ապրելու համար, սակայն Հայաստանում սոցիալական հարցերը լուծելու համար են դրանք օգտագործվում:
ՕԵԿ-ական պատգամավորը հիշեցրեց, որ խորհրդարան բերված նախագիծը չի քննարկվել ԱԺ-ում և նշեց, որ բոլոր խմբակցությունները պետք է մասնակցեին քննարկումներին, հայտնեին իրենց տեսակետները, որպեսզի հնարավոր լիներ խոսել ավելի մշակված փաթեթի մասին. «Մենք պետք է կարողանանք որոշակի շտկումներ անել, հակառակ դեպքում նախագիծը պետք է հետ տարվի»:
«Մենք խոսում ենք քաղաքացիա-իրավական մի խնդրի մասին, որը փորձ է արվում քրեականացնել: Իսկ մեր երկրում տասնյակ հազարավոր նման դեպքեր կան: Մենք չենք ասում, որ մարդիկ պետք է պատասխան չտան իրենց հանցագործությունների համար, սակայն ֆինանսական խնդիրները քրեականացման տանելը լուրջ խնդիր է»,- ասաց Բիշարյանը` հավելելով, որ ՕԵԿ-ի համար դա անընդունելի է:
