«ՕԵԿ-ը բազմիցս խոսել է տնտեսական կյանքի ապաքրեականացման անհրաժեշտության մասին: Բազմիցս նաև օրենսդրական նախաձեռնություններ ենք ներկայացրել այս խնդրի կարգավորման համար, որովհետև, եթե մենք խոսում ենք ազատ շուկայական տնտեսության, մանր և միջին, ինչպես նաև խոշոր բիզնեսի զարգացման, ֆինանսա-տնտեսական հարաբերությունների ոլորտի ազատականացման մասին և նայում ենք հատկապես տնտեսական աճ ապահովող երկրների փորձը, տեսնում ենք, որ այդ երկրներում տնտեսական կյանքի ապաքրեականացումը շատ ավելի լայն է ընդունված, քան այն երկրներում, որտեղ հիմնախնդիրներ կան»,- այսօր` նոյեմբերի 23-ին, խորհրդարանում «ՀՀ քաղաքացիական օրենսգրքում լրացումներ և փոփոխություններ կատարելու մասին» և կից ներկայացված օրենքի նախագծերի փաթեթն առաջին ընթերցմամբ ընդունելու մասին հարցի քննարկման ժամանակ հայտարարեց ԱԺ ՕԵԿ խմբակցության պատգամավոր Մհեր Շահգելդյանը:
Մ. Շահգելդյանը նշեց, որ իրենց համար կարևոր է, որ տնտեսական կյանքը հնարավորինս ապաքրեականացվի, և խոսքը չի վերաբերում լուրջ հանցագործություններին: Նա նաև կարծիք հայտնեց, որ տնտեսական զարացման բացակայության, տնտեսական ճգնաժամի, աղքատության աճի պայմաններում տնտեսական հարաբերություններն ընդհակառակը պետք է ազատականացվեն. «Իսկ Հայաստանում այսօր աղքատությունը խորանում է, 32 տոկոսը լրիվ աղքատ են, մարդիկ հեռանում են Հայաստանից բիզնեսը փակվում է, տները, մեքենաները չեն վաճառվում, իսկ այս պայմաններում նման նախագիծն անընդունելի է»: