Սահմանադրական հանրաքվեին ընդառաջ լրատվական միջոցները բարձրաձայնում են, որ իշխանության ներկայացուցիչները բուհերում, դպրոցներում, հանրակրթական այլ վայրերում, բժշկական հաստատություններում՝ հիվանդանոցներում, պոլիկլինիկաներում ակտիվորեն «ԱՅՈ»-ի քարոզչություն են իրականացնում։ Ըստ հրապարակումների՝ բոլոր համապետական ընտրություններից առաջ իշխանությունն օգտագործում է վարչական լծակները և հենվում բուհերի, դպրոցների, կրթական այլ հաստատությունների, մշակույթային միությունների, բուժհիմնարկների պետական ծառայողների վրա։
Օրերս մամուլում հրապարակում եղավ այն մասին, որ Երևանի Մալաթիա-Սեբաստիա բժշկական կենտրոնի աշխատակիցներին բլանկներ են բաժանվել՝ 10-ական ձայն հավաքելու համար։
Առողջապահության նախարար Արմեն Մուրադյանն հայտարարում է, թե բուժհաստատություններում սահմանադրական փոփոխությունների ԱՅՈ-ի քարոզչություն չի իրականացվում, աշխատակիցներին չեն պարտադրում ԱՅՈ-ի ձայներ հավաքել։ Մինչդեռ, Առողջապահության նախկին նախարար Արարատ Մկրտչյանն ասում է՝ բոլոր ընտրություններից առաջ էլ բժշկական հաստատություններում քարոզչություն իրականացվել է։
Մկրտչյանը նշում, թե յուրաքանչյուր ընտրությունից առաջ հրահանգ է իջեցվում, թե ինչ մակարդակով է քարզչություն լինելու, և տարիների ընթացքում այդ մեխանիզմը չի փոխվել։
Սակայն, նախկին նախարարն իր աշխատանքային փորձից ելնելով համոզված է՝ արդյունավետ չէ բուժհիմնարկների աշխատակիցների ռեսուրսներն օգտագործելը։ Մեր զրուցակիցը փաստում է՝ իր պաշտոնավարման ժամանակ և հիմա բժշկական հիմնարկներում, և առհասարակ բոլոր պետական կառույցներում տարվող քարոզչության մեխանիզմների որոշակի տարբերություն, այնուամենայնիվ, կա։