Ֆուտբոլի Հայաստանի ազգային հավաքականի ՖԱՖ շան շարժման ներկայացուցիչները, բազմաթիվ այլ երկրպագուներ, ակտիվիստներ իրականացրին երթ դեպի Խանջյան փողոցում գտնվող Հայաստանի ֆուտբոլի ֆեդերացիայի շենք։
Վերջին շրջանում հավաքականի անհաջող ելույթներից հետո «Առաջին ճակատ»-ը Հայաստանի ֆուտբոլի ֆեդերացիային 3 պահանջ էր ներկայացրել՝ պայմանագիր կնքել արտասահմանցի, փորձառու մարզչի հետ, իջեցնել հավաքականի մասնակցությամբ խաղերի տոմսերի գներն ու ազգային թիմ հրավիրել այն ֆուտբոլիստներին, ովքեր հրավեր չեն ստանում ՀՖՖ-ի հետ այս կամ այն կոնֆլիկտի պատճառով։ Երկրպագուները 1 ամիս ժամանակ էին տվել պահանջներն ի կատար ածելու համար։ ՀՖՖ նախագահն ի պատասխան՝ ՖԱՖ-ին անվանել էր խմբակ ու ֆան շարժմանը կոչ արել զբաղվել տուրիստական գործունեությամբ։
Հասնելով ՀՖՖ շենքի մոտ, ՖԱՖ-ի ղեկավար կազմի անդամ Էդգար Պետրոսյանը ևս մեկ անգամ հնչեցրեց պահանջները։ ՖԱՖ-ը պատասխան էր ակնկալում ֆեդերացիայից, սակայն մոտ մեկուկես ժամ սպասելուց հետո այդպես էլ ՀՖՖ-ի որևէ ներկայացուցիչ չներկայացավ բանակցությունների։
Այդ ընթացքում մի քանի երկրպագուներ, այդ թվում և ղեկավար կազմի անդամ Սերգեյ Ջանջոյանը, փողոցի երթևեկելի մասում ճայթրուկներ այրեցին։ Ոստիկանությունը բերման ենթարկեց նրանց, սակայն որոշ ժամանակ անց նրանք ազատ արձակվեցին ու միացան Խանջյան փողոցում գտնվող երկրպագուներին։
Երթը եզրափակվեց Սերգեյ Ջանջոյանի խոսքով։ վերջինս նշեց, որ «Առաջին ճակատ»-ն այս ընթացքում արել է հնարավորը կառուցողական բանակցությունների համար և ՀՖՖ-ի վիրավորական պատասխանն ու արհամարհական վերաբերմունքն այլևս չի կարող հանդուրժել։ «Առաջին ճակատ»-ը հնչեցրեց ՀՖՖ նախագահ Ռուբեն Հայրապետյանի հրաժարականի պահանջ։ ՖԱՖ-ի հաջորդ երթը տեղի կունենա առաջիկա ուրբաթ օրը։