Նավթային շուկաները կշարունակեն հագենալ հաջորդ 5 տարիներին, քանի որ արտահանողները Մերձավոր Արևելքում ավելացնում են արտադրողականությունը: Այս մասին հայտնում է Bloomberg-ը՝ հղում անելով Նավթ արտահանող երկրների կազմակերպությունում (ՕՊԵԿ) Քուվեյթի ներկայացուցիչ Մոհամմեդ ալ-Շատտիին:
Գործակալության հավաքած տվյալների համաձայն՝ հունիսին Իրաքն օրական արդյունահանել է ռեկորդային՝ 4,4 մլն բարել: Ալ-Շատտին հավելել է, որ Լիբիայի արտադրողականությունը, որը ռազմական հակամարտության ֆոնին կրճատվել է ավելի քան 2 անգամ, կարող է ցանկացած պահի վերսկսվել:
«Իրանը կարող է իր արտահանումն օրական ավելացնել 500 հազար բարելով՝ պատժամիջոցների վերացումից հետո 1 շաբաթվա ընթացքում, և օրական 1 մլն-ով՝ 3 ամսվա ընթացքում»,- հայտարարել է Իրանի ազգային նավթային ընկերության գործադիր տնօրեն Ռոքնեդին Ջավադին:
«Գների անկումը կշարունակվի՝ մինչև չավարտվի շուկայի գերհագեցումը: Մենք սպասում ենք արտադրության ավելացում շատ երկրներում, մասնավորապես՝ Իրանից հումքի վերադարձ»,- ասել է ալ-Շատտին: