Sony ընկերությունը ապրիլի 26-ին Տոկիոյում ներկայացրել է երկու նոր պլանշետային համակարգիչներ, որոնք աշխատում են Android 3.0 Honeycomb օպերացիոն համակարգով: Սարքերը ստացել են S1 և S2 կոդային անվանումները:
S1-ը նման է մյուս ընեկրությունների կողմից արտադրված պլանշետներին և ունի 9.4 դյույմանոց էկրան: Սարքի պրոցեսորը` Nvidia Tegra 2, երկմիջուկ է և ունի երկու տեսախցիկ` դիմացի և հետևի կողմերում: Այն ունի նաև ինֆրակարմիր միացման հնարավորություն, ինչի շնորհիվ կարող է աշխատել որպես հեռուստացույցի հեռակառավարման վահանակ:
S2 պլանշետային համակարգիչն ունի ծալվող հեռախոսների տեսք` երկու էկրանով, յուրաքանչյուր էկրանը՝ 5.5 դյույմ: Էկրանները կարելի է միացնել և օգտագործել որպես մեկ էկրան: Ներքևի էկրանը կարող է ծառայել նաև որպես ստեղնաշար: Երկու պլանշետներն էլ ունեն Wi-Fi և 3G/4G միացման հնարավորություն: Այս սարքերի վրա հնարավոր է նաև խաղալ Sony-ի ամենահայտնի արտադրանքներից մեկի` PlayStation-ի խաղերը: Ճապոնական ընկերության այս սարքերն արտադրության մեջ կլինեն արդեն այս տարվա աշնանը: